Pinakdaaran ni Bise Presidente (BP) Sara Duterte ita nga aldaw, Hunio 16, dagiti grupo ti negosiante a saanda nga usaren ti umadani nga impeachment trial a pagpambar iti nakapuy nga ekonomia ken pannakapukaw ti panagtalek dagiti agpuonan iti pagilian.
Iti maysa a press conference iti Davao City, kinuna ni BP Duterte nga adda man wenno awan ti impeachment, awan latta ti investor confidence iti pagilian, ta agpabpababa ti foreign direct investment.
Kinuna daytoy ni BP Duterte kas sungbatna iti nabileg a Makati Business Club (MBC), a nangdagadag iti pannakabukel ti impeachment court, a nangdakamat iti epekto ti di pannakaikankano ti rule of law iti public accountability ken investor confidence.
Inyebkas met ti Management Association of the Philippines (MAP) ti pakaseknanda iti inaramid ti impeachment court ti Senado a nangisubli iti articles of impeachment ni BP Duterte iti Kamara, ket kinunada a rumbeng a maituloy ti impeachment trial tapno tumibker ti demokratiko a proseso ti pagilian.
Dua a babbai, nakemmeg gapu iti online sexual abuse, exploitation iti Tarlac
Kinuestionar ni Duterte no kasano a magun-od ti accountability manipud iti impeachment trial idinto a pannakaikkat iti posision ken agnanayon a pannakadiskualipikar iti panagakem iti gobierno laeng ti dusa a mabalin nga ipatay ti impeachment trial. Kinuna ni Duterte a no kayatda ti accountability, masapul nga ipilada ti kaso iti korte.
Innayon ni Duterte a rumbeng a kuestionarenda met no kasano a nabukel ti articles of impeachment ken nayawat iti Senado.
Saan pay a rinugian ti impeachment court ti Senado ti impeachment trial ni Duterte kalpasan a nagdesision ti Senado babaen ti botos a 18-5 a maisubli ti articles of impeachment iti Kamara.
Impaulog ti Kamara ti House Resolution No. 2346 a nangpasingked a siiinget a tinungpalda ti linteg mainaig iti impeachment complaint, ngem saanda pay a nayawat daytoy a resolusion iti Senado ta adda pay kayatda a malawlawagan. (Raymund Antonio/Manila Bulletin//Lito Hilidon/Bannawag)
