Dua nga agkabsat a babbai ti kinemmeg dagiti kameng ti National Bureau of Investigation (NBI) iti Concepcion, Tarlac idi Hunio 10 gapu iti pannakairamanda iti online sexual abuse ken exploitation of children.
Imparang ni NBI Director Jaime B. Santiago ita nga aldaw, Hunio 16, dagiti agkabsat a suspek, a saanda nga impalgak ti naganda, nga inarestar dagiti kameng ti Violence Against Women and Children Division ti NBI (NBI-VAWCD) bayat ti pannakaipatungpal ti Warrant to Search, Seize, and Examine Computer Data (WSSECD).
Naispal dagiti kameng ti NBI ti sangapulo nga ubbing a biktima, a pakairamanan ti pito a lallaki ken tallo a babbai nga agtawen manipud tallo a bulan agingga iti 16, ket naipanda iti Department of Social Welfare and Development (DSWD).
Nagpakaasi ni Santiago kadagiti nagannak a salaknibanda koma dagiti annakda manipud kadagiti seksual a panangabuso ken pananggundaway iti internet, ket imbalakadna a saan a solusion iti kinakurapay ti pananggundaway kadagiti ubbing.
Sara Duterte, addaan 16 nga abogado a mangidepensa kenkuana
Kuna ni NBI-VAWCD Chief Yehlen C. Agus a ti naisayangkat nga operasion idi Hunio 10 ket paset ti follow-up operation iti pannakakemmeg ti Swedish national a ni Heinz Henry Andreas Berglund iti Angeles City, Pampanga idi Abril 2.
Inarestar ti NBI ni Berglund gapu iti bileg ti red notice nga impaulog ti International Criminal Police Organization (Interpol) manipud iti arrest warrant iti Sweden gapu iti maipagarup a panangramesna iti 10 ti tawenna a babai idi 2021.
Sakbay nga immay ni Berglund iti Filipinas, natakuatan ni Agus a baybayadanen ni Burgland dagiti dua a babbai para iti child sexual abuse and exploitation materials (CSAEM) manipud ₱200 agingga ₱4,000.
Segun ken ni Agus, napakaammuan ti NBI mainaig iti panagbiahe ni Berglund iti Filipinas tapno mangbiktima kadaigti ubbing ken kakumplotna dagiti dua a babbai. (Jeffrey Damicog/Manila Bulletin//Lito Hilidon//Bannawag)
