Inyalat ni Katrina Anne Johnson, 27, a tubo ti Davao, ti Bb. Pilipinas International 2025 idinto a ni Annabelle Mae McDonell, 24, a tubo ti Iligan, ti nangyalat iti titulo a Bb. Pilipinas Globe 2025, iti naangay a 61st Grand Coronation Night iti Smart Araneta Coliseum iti Siudad ti Quezon itay Hunio 15.

Ni Johnson, maysa a lisensiado a pharmacist, ti mangibagi iti Filipinas iti 2026 Miss International pageant. Ni met McDonell, a maysa a beterana iti pageant, ti mangibagi iti Miss Globe 2025. Nakisalipen ni McDonel iti Binibining Pilipinas idi 2023.

Ni Dalia Khattab ti Las Piñas ti nakagun-od iti 1st runner-up, idinto a ni Kathleen Enid Espenido, a tubo ti Siargao, ti nangyalat iti 2nd runner-up.

Iti sabali a bangir, inyalat ni Alyssa Mildred V. Villariña, ti probinsia ti Rizal) ti Manila Bulletin Readers' Choice award.

Nasional

Kasapulan ti natibker ken nainkalintegan a pagtaktakderan iti parikut iti WPS --NMC

Dagiti nangabak iti Bb. Pilipinas 2025 (agpakanawan): 2nd Runner Up - Kathleen Enid Espenido (Siargao); Bb. Pilipinas Globe - Annabelle Mae McDonnell (Iligan City); Bb. Pilipinas International - Katrina Anne Johnson (Davao Province); 1st Runner Up - Dalia Varde Khattab (Las Piñas).

Iti benneg ti question and answer, nasaludsod ken ni Johnson: "Ti kinaulbod a maibalikas iti maminribu ket agbalin a kinapudno. Ania ti makunam iti dayta?"

Insungbat ni Johnson: "Panagkunak, dakkel a bendision kadatayo ti social media ken internet ta babaen dagitoy, maaddaantayo iti online a komunidad a kaduatayo dagiti tattao iti amin a paset ti lubong. Ngem, wen, ti fake news ket maysa a nasaknap a parikut ita, ket kinapudnona, pagarupek a ti kasayaatan a wagas tapno masarangettayo dayta ti pangisurotayo kadagiti tao no kasano a malasinda ti pudno nga impormasion. Masapul a sipapanunottayo. Kasapulantayo ti mangkontrol ken mangaramid kadagiti online a komunidadtayo a natalged a lugar para iti amin. Agyamanak."

Inyalat pay ni Johnson ti Binibining Dunkin ken ti Best in Evening Gown award.

Nagpaay a hurado ita a tawen da Filipino fashion designer Francis Libiran, Alice Dixson, agdama a Miss International Hyun Thi Thann Thuy (Vietnam), agdama a Miss Globe Diana Moreno (Colombia), MTRCB chairperson Lala Sotto, ken ni Dr. Ralph Figaroa Delas Alas, idinto a nagpaay a kas Chairman of the Board ni Conchitina Bernardo. (Robert Requintina/Manila Bulletin//Lito Hilidon/Bannawag)