Binilin ni Presidente Ferdinand Marcos Jr. ita nga aldaw, Hunio 16, dagiti maseknan nga ahensia a pardasanda ti mangipaay iti tulong kadagiti Filipino a nairaman iti panaggubat ti Israel ken Iran.
Segun ken ni Undersecretary ti Presidential Communications Office (PCO) Claire Castro, binilin ni Presidente Marcos Jr. ti Department of Foreign Affairs (DFA), ti Department of Migrant Workers (DMW), ken ti Overseas Workers Welfare Administration (OWWA) nga ipaayda ti napardas a tulong kadagiti Filipino nga adda kadagiti nadakamat a pagilian, nga awan ti mabaybay-an.
Kinuna ni Castro nga adda iti "crisis mode" ken “heightened alert” dagiti nadakamat nga ahensia tapno masigurado ti kinatalged dagiti Overseas Filipino Workers (OFWs) iti rehion.
Innayonna nga addan dagiti contingency plans no bilang ta kasapulan a mayawid dagiti OFW sadiay.
Pagalagadan iti MAIFIP mainaig iti pannakaiparit ti guarantee letter, iruar ti DOH inton Pebrero
Nangibaon ti DFA iti maysa a team a mangtingiting iti situasion ken kasasaad dagiti naapektaran a Filipino.
Tapno makaipaay dagiti kaudian nga impormasion ken tulong, nanglukat ti DMW ken OWWA iti numero a mabalin nga awagan kas iti 1348 (no adda iti Filipinas) ken +6321348 (no adda iti abroad). (Argyll Cyrus Geducos/Manila Bulletin//Lito Hilidon/Bannawag)
