Agas-asuk ti natiruan iti Iranian missile a paset ti maysa nga oil refinery iti Haifa, amianan ti Israel, idi nasapa a Lunes, Hunio 16, 2025. (AP Photo/Ariel Schalit)

Mapan a 109 a mangmangged a Filipino iti ballasiw-taaw (OFW) ti nangipasimudaag iti intensionda nga agawiden iti Filipinas gapu iti kumarkaro a panagbomba dagiti eroplano ken panagpinnabanto iti missile attack iti nagbaetan ti Israel ken Iran, kinuna ti Department of Migrant Workers (DMW) ita a Martes, Hunio 17.

Segun ken ni DMW Secretary Hans Leo Cacdac, agtultuloy ti panangmonitorda iti kasasaad iti Israel tapno makaiwayatda kadagiti addang para iti madagdagus a repatriation dagiti OFW nga addan iti listaanda.

"Iti agdama, nakaserra ti air space ken dagiti airport, sapay koma ta maaddaantay' iti gundaway para iti repatriation apaman maluktan ti air space," kinuna ni Cacdac, iti maysa nga interbiu iti GMA.

Kadagiti 109 nga OFW iti Israel nga adda iti listaanda, kinuna ni Cacdac a 85 kadagitoy ti nangipasimudaag iti panggepda a pumanaw sakbay a nangisayangkat ti Israel iti air raid kadagiti kangrunaan a pasilidad iti Iran idi Biernes, Hunio 13.

Nasional

Independent People's Commission, anti-political dynasty, party-list reform bill, prioridad ti Senado

Kinunana a 25 pay nga OFW ti nailista iti napalabas a sumagmamano nga aldaw, kalpasan ti umuna a pannakaipabanto dagiti ballistic missile manipud Iran a nangtiro iti nangruna a luglugar iti Israel.

"Iti agdama, addan 109 nga OFW iti listaan, ken umad-adu pay. Dagiti OFW a kayatda ti mayawid ti agtultuloy a mabilang," kinuna ni Cacdac. Innayonna a kitkitaenda ti dadduma pay a wagas no kasano a maipan dagiti OFW iti repatriation list iti natalged a lugar a pakapilian dagitoy para iti panagbiaheda nga agsubli iti Filipinas.

Sakbayna, kinuna ni Cacdac nga impaayanda iti tulong dagiti 14 nga OFW a nakalasat iti missile attack iti maysa a residential building iti Rehovot City iti Israel.

Innayonna nga ipapaayda met amin a kasapulan a suporta iti maysa nga OFW a kritikal ti kasasaadna kalpasan a naapektaran iti panagbettak ti missile iti Israel.

Nai-repatriate metten ti DMW ti 18 a Filipino nga agturong idiay Jordan nga stranded iti Dubai.

Binalakadan met ni Cacdac dagiti OFW a liklikanda ti makipaset iti ania man a social media political discussion mainaig iti agtultuloy a riri ti Israel ken Iran.

"Saankayo makipaset iti ania man a diskusion, nangruna iti panagiwaras iti peke a damag," kinuna ni Cacdac. Inyunay-unayna a dumngeg ketdi koma dagiti OFW iti safety protocol dagiti yanda a pagilian. (Aaron Recuenco/MANILA BULLETIN)