Imbilin ni Transportation Secretary Vince Dizon idi Lunes, Hunio 16, ti pannakaikkat ti dua nga opisial ti Land Transportation Office (LTO) Region 2 iti Cagayan gapu iti mapapati a panangdangranda iti maysa a menor de edad ken sabali pay a tao iti maysa a karaoke lounge, a nag-viral ti video-na iti social media.
Imbilin ni Dizon ti dagus a pannakareliebo da LTO Region 2 Assistant Regional Director Manuel Baricaua ken Chief Enforcer Charles Ursolum manipud kadagiti puestoda.
Segun pay ken ni Dizon, addan naipatulod ti surat a naiturong ken ni Executive Secretary Lucas Bersamin iti Opisina ti Presidente a mangidawdawat iti permanente a pannakaikkat ni Baricaua.
Iti video, makita da Baricaua ken Ursolum a nangsipat ken nangkugtar iti maysa a 15-anios a lalaki, ken adda pay dagiti report a dinangranda met ti maysa a 20-anios a lalaki--agpada a kadua ti maysa a 20-anios a babai a kumakanta a nagkedked iti kidkiddawen dagiti dua nga opisial ti LTO, iti maysa a karaoke lounge.
National Guard ti Minnesota, nagtignay kalpasan ti panangpaltog ti federal immigration officer iti maysa a lalaki a nars
Iti press conference iti LTO Central Office iti Quezon City, kinuna ni Dizon a nairugin ti imbestigasion, ngem ti video evidence kontra kadagiti opisial ti LTO ti nangigapu iti automatic relief dagiti dua kadagiti puestoda.
"Kiniddawmi met [iti hepe ti LTO, Assistant Secretary Vigor Mendoza II] a makonta dagiti biktima ket matulongan ida iti ania man a wagas iti pannakaipila ti kaso -- Panagkunak ket makasuan iti physical assault dagitoy a dua a tattao. Awan ti excuse para iti para iti daytoy," kinunana.
Impaganetgetna a ti aramid dagiti opisial ti gobierno, yanninawda ti posisionda iti gobierno, ken ad-adu ti responsibilidadda, nangruna no makiramramanda kadagiti illegal nga aktibidad.
“Insapatam a surotem ti linteg ken salaknibam ti publiko. Isu nga adda nadagsen a pannusa no salungasingem ti linteg. Nangnangruna iti kastoy a situasion a pisikal a dinangram ti maysa a tao. Menor de edad pay ti dinangram,” kinunana.
Iti sabali a bangir, kinuna ni Mendoza a nabagaanen dagiti dua nga opisial ti LTO tapno ilawlawagda ti rasonda ket indatagdan ti sungbatda idi napan a lawas, kas paset ti karbenganda iti due process.
Segun ken ni Mendoza, ti kaso kontra kadagiti dua nga opisial ket panaglabsing iti code of conduct para kadagiti public official ken empleado iti Filipinas.
“Di met mapaglibakan ti napasamak iti video, isu a maibilang a kinapudno, ket mabalinen a madesisionan,” kinunana.
Segun met kadagiti paskil iti social media, bayat ti panagkanta ti bandada iti maysa a karaoke lounge, kiniddaw dagiti dua nga opisial ti LTO a makikatugaw kadakuada ti babai a kumakanta, ngem nagkedked daytoy ta saan a paset ti trabahona.
Mapapati a daytoy ti nangtignay iti panangdangran kadagiti dua a lallaki, nga agpada nga student workers, a katulongan ti banda. (Raymond Carl Dela Cruz/PNA)
