Kinemmeg dagiti operatiba ti Quezon City Police District (QCPD) ni Francis Steve Fontillas, ti polis a naikkat iti trabahona gapu iti panangbabbabalawna kadagiti top police official gapu iti pannakaarestar ni dati a presidente Rodrigo Duterte, kinuna ti Philippine National Police (PNP).
Naarestar ni Fontillas idi Lunes, Hunio 16, iti Commonwealth, Quezon City maibasar iti arrest warrant nga inruar ti Quezon City Regional Trial Court gapu iti panangsugsogna iti panangrippuog ti gobierno wenno inciting to sedition.
Inrekomendar ti korte ti piansa a ₱36,000 para iti temporario a wayawaya ni Fontillas, a maysa a vlogger.
Nagtaud ti kaso iti criminal complaint a naipila kontra kenkuana gapu iti panangipaskilna kadagiti seditious remarks a panangrippuog iti gobierno ken panangipangta iti International Criminal Police Organization bayat a sikakawes iti uniporme ti PNP.
Kasapulan ti natibker ken nainkalintegan a pagtaktakderan iti parikut iti WPS --NMC
"Addan warrant of arrest para kenkuana isu a masapul a maipatungpal ti warrant," kinuna ni hepe ti PNP Gen. Nicolas Torre III iti maysa nga interbiu ti media.
Kinuna ni Torre maysa laeng nga isolated case ni Fontillas iti uneg ti organisasion ti polisia.
Idi Mayo 8, inikkat ti National Police Commission (Napolcom) ni Fontillas a kas polis gapu iti grave misconduct, conduct unbecoming of a police officer, ken disloyalty to the government.
Permanente pay a diniskualipikar ti Napolcom ni Fontillas a makasubli nga agtrabaho iti serbisio publiko. (Christopher Lloyd Caliwan/PNA)
