Agtalek ni Presidente Ferdinand Marcos Jr. a mabalin nga agtalinaed ti ₱20 kada kilo a presio ti bagas a mailaklako kadagiti Kadiwa stores uray saan a ponduan ti gobierno, gapu iti kaadu ti maapit nga irik ken agtultuloy a panangsuportar ti gobierno kadagiti mannalon.
Iti podcast ni Marcos a nairuar ita nga aldaw, Hunio 18, namnamaenna nga ita a tawen, marimbawan ti pagilian ti maapit nga irik idi 2023 (20.06 a milion a metrika tonelada) ken idi 2024 (9.09 a milion a metrika tonelada).
Inlawlawag ni Marcos a ti nababa a gastos ti panagtalon, umadu nga apit, ken pananggatang ti NFA (National Food Authority), lumaka ti presio ti bagas iti merkado.
Segun ken ni Marcos, naipamaysa ti tulong ti gobierno iti pannakaipaay ti makinaria, panangtarimaan kadagiti pasayak, ken panangsuporta iti sukisok babaen ti International Rice Research Institute (IRRI) ken ti University of the Philippines-Los Baños.
Kasapulan ti natibker ken nainkalintegan a pagtaktakderan iti parikut iti WPS --NMC
Sinungbatan ni Marcos dagiti maseknan iti panaglaka ti bagas a makadadael kadagiti mannalon, ket inkarina a saan nga ibaba ti NFA ti presio ti panaggatangda iti irik, ta narigat ti agtalon. (Argyll Cyrus Geducos/Manila Bulletin//Lito Hilidon/Bannawag)
