Kinuna ti Department of Justice (DOJ) ita a Mierkoles, Hunio 18, nga addan ni dati a presidential spokesperson Harry Roque iti Germany ket mapapati nga agkidkiddaw iti asylum iti nasao a pagilian kalpasan a nagkedkedan ti Netherlands ti kiddawna.
"Ti ammok, saan nga inikkkan ti Netherlands iti asylum. Isu a ti Germany met ita ti mangikeddeng no ipaayanna daytoy," kinuna ni Justice Secretary Jesus Crispin Remulla iti maysa nga interbiu kadagiti reporter.
Kinunana nga urayen ti DOJ dagiti sumaruno a mapasamak sakbay nga ituloy ti gobierno ti Filipinas ti kaso nga extradition kontra ken ni Roque.
"Urayentayo. Mabalin a maipila ti extradition request no dumteng ti oras. Ngem mabalin met a saanen a kasapulan gapu ta makanselaren ti pasaportena. No agbalin isuna nga undocumented alien, mabalinen a piduten ti Interpol," kinunana.
Kasapulan ti natibker ken nainkalintegan a pagtaktakderan iti parikut iti WPS --NMC
Nupay kasta, inlawlawag ti ni Remulla nga adda kadagiti korte ti pangngeddeng iti pinal a pannakakanselar ti pasaporte ni Roque.
Kinunana pay ni Remulla a mabalin nga agbiahe ni Roque kadagiti dadduma a pagilian ti Europa babaen ti open border policy ti European Union (EU), basta addaan iti valid visa.
"Ngem no maysa isunan a fugitive from justice, aglalo no maawanen ti dokumentasionna, mabalinen a kamaten isuna ti Interpol," innayon ni Remulla.
Sumangsango ni Roque iti kaso a qualified human trafficking gapu iti mapapati a pannakairamanna iti Philippine offshore gaming operator (POGO) hub iti Porac, Pampanga. (Benjamin Pulta/PNA)
