Bayat ti panaglukat manen dagiti eskuela iti entero a pagilian, pinalagipan ti Department of Social Welfare and Development (DSWD) dagiti benepisiario ti Pantawid Pamilyang Pilipino Program (4Ps) a siguraduenda a regular nga ages-eskuela dagiti annakda, ta maysa daytoy kadagiti kangrunaan a kasapulan tapno adda maawatda a cash grant.
Segun iti pagalagadan ti 4Ps, dagiti ubbing nga agtawen iti tallo agingga iti 18 ket masapul a nakalista ken mamantenerda ti 85 a porsiento a panagatendar iti eskuela tapno agtalinaed a maikari iti education grant ti 4Ps.
Iti sidong ti programa, umawat dagiti benepisiario iti educational cash grant a binulan a ₱300 para kadagiti adda iti elementaria, ₱500 para kadagiti junior high school, ken ₱700 para kadagiti senior high school student, a makatungpal iti attendance requirement.
Kinuna ni DSWD Director ken 4Ps National Program Manager Gemma Gabuya ita nga aldaw, Hunio 18, nga adda programa ti DSWD a “Bata Balik Eskwela” para kadagiti saan a nakaatendar iti eskuela gapu iti nadumaduma a kasasaad.
Kasapulan ti natibker ken nainkalintegan a pagtaktakderan iti parikut iti WPS --NMC
Malaksid iti educational grant, makaawat pay ti tunggal pamilia a benepisiario iti binulan a health and nutrition grant a ₱750, a kadua ti binulan a rice subsidy a ₱600.
Dagiti masikog a benepisiario agraman dagiti pamilia nga addaan annak nga agtawen iti dua agpababa, ket umawat iti nayon a ₱350 a health grant iti binulan.
Tapno agtultuloy nga umawat iti tulong, masapul a matungpal dagiti benepisiario dagiti kasapulan ti programa, agraman ti regular a panagatendar iti eskuela, health checkup, ken pannakipaset kadagiti family development sessions. (Ellalyn De Vera-Ruiz/Manila Bulletin//Lito Hilidon/Bannawag)
