Dinadagdag ti maysa a grupo dagiti human rights lawyer ti International Criminal Court (ICC) a saanda a patgan ti kiddaw ni dati a presidente Rodrigo Duterte nga interim release manipud iti pretrial detention, gapu ta agtultuloy nga apektaranna ti kinatalged dagiti saksi ken dagiti "sistematiko a lapped iti accountability" iti Filipinas.
Segun iti statement ti grupo a CenterLaw idi Hunio 17, maseknanda ta ti pannakaruk-at ni Duterte manipud iti kustodia ket mangted iti direkta a pangta iti kinatalged, seguridad, dignidad, ken kinapribado dagiti biktima iti Filipinas ken iti ballasiw-taaw, ken makadadael iti kinasin-aw ti pannakausigna iti kasona a crimes against humanity.
Kinuna ti CenterLaw nga uray nakabalud ni Duterte iti The Hague, Netherlands, agtultuloy latta dagiti panangriribuk, pammutbutbuteng ken nasaknap a panangpadpadakes nga ar-aramiden dagiti pasurot ni Duterte kadagiti nainaig iti kasona iti ICC iti Filipinas ken iti The Hague.
Impaganetget ti CenterLaw a di rumbeng a maisina ti pannakaibalud ni Duterte iti agdama a kasasaad ti politika iti Filipinas, a kas iti inaramid ti Senado a nanglabsing iti karbenganda iti Konstitusion a mangiwayat iti impeachment trial ni Bise Presidente Sara Duterte.
Kasapulan ti natibker ken nainkalintegan a pagtaktakderan iti parikut iti WPS --NMC
Innayon ti CenterLaw a no patgan ti ICC ti kiddaw ni Duterte nga interim release, dayta ti mangipakita kadagiti Filipino a masalsalakniban dagiti mannakabalin idinto nga awan latta ti pagkamangan wenno maaramidan dagiti biktima. (Raymund Antonio/Manila Bulletin//Lito Hilidon/Bannawag)
