Imbilin ni Presidente Ferdinand R. Marcos Jr. iti Philippine National Police (PNP) ken Philippine Coast Guard (PCG) a paingtenda ti seguridad kadagiti amin a kangrunaan a pagserkan ti droga ken siguraduen a madadael a dagus dagiti nakompiskar a narkotiko tapno saan a mailako manen dagitoy kadagiti kalkalsada.
“Imbagak iti Coast Guard ken PNP nga agbantayda ta diak kayat nga agsubli dagita a droga iti merkado. Dadaelenyo a dagus dagitoy iti kabiitan a panawen,” kinuna ni Marcos iti kaudian a podcastna ita a Mierkoles, Hunio 18.
Paset ti direktiba ti presidente ti recalibrated national drug strategy a maipamaysa iti panangpasardeng kadagiti narkotiko manipud iti pagtaudanda--dagiti pagsangladan, ig-igid ti baybay, ken dadduma pay a ruta iti baybay--a pagaammo a pakaar-aramidan dagiti large-volume nga operasion ti panagpuslit.
Impaganetgetna ti kasapulan a naan-anay a transparency ken ti pisikal a kaadda dagiti pannakabagi ti linteg bayat ti pannakadadael dagiti nasamsam a droga.
Kasapulan ti natibker ken nainkalintegan a pagtaktakderan iti parikut iti WPS --NMC
“Siguraduenyo nga addakayo sadiay no kunada nga adu a tonelada, mano a tonelada (a droga) ti talaga nga adda dita. Saan a makissayan. Bilangenyo a naimbag, kalpasanna, sibuganyo iti gasolina, puoranyo,” kinunana.
Naibaga daytoy ti presidente kalpasan dagiti dadakkel a pannakasamsam ti mapapati a shabu kadagiti probinsia ti Zambales, Bataan, Ilocos Sur, ken Pangasinan idi Hunio 10, a nakaalaan iti 66 a sako a naglaon iti 1,297.9 a kilo ti shabu, nga agbalor iti ₱8.8 a bilion, nga agpapada a nasarakan dagiti komunidad iti igid ti baybay. (Darryl John Esguerra/PNA)
