Pinatgan ti Commission on Elections (Comelec) Second Division, babaen ti botos a 2-1, ti kiddaw a mawaswas ti rehistro ti Duterte Youth Party-list, a maikadua iti kaaduan ti botos idi May 2025 election.
Maibatay iti resolusion a naipaulog ita nga aldaw, Hunio 18, kiniddaw dagiti nagpetision a da Reeya Beatrice Magtalas, Abigal Aleli tan, Raainah Punzalan, ken Aunell Ross Angco a mawaswas koma ti pannakairehistro ti Duterte Youth. Inrasonda a saan a natungpal ti Duterte Youth ti kasapulan a pannakaipablaak ken panangbista, nga agpada a hurisdiksion ti kababalinna.
Malaksid iti daytoy, kinuna dagiti nagpetision a nakaaramid ti Duterte Youth iti panaglabsing a mabalin a pakaibatayan iti pannakawaswas ti rehistro daytoy.
Ngem kinuna ni Comelec Chairman George Erwin Garcia, mabalin pay a mangidatag ti Duterte Youth iti motion for reconsideration iti Comelec en banc.
₱800 a nayon iti binulan a sueldo dagiti katulongan iti NCR, marugian inton Pebrero 7
Inlawlawag ni Garcia nga awan pay ti epekto daytoy iti resulta ti eleksion ta agbalin laeng a final and executory ti pangngeddeng lima nga aldaw kalpasan ti pannakaipaulog daytoy, malaksid no maipila ti motion for reconsideration.
Kaipapananna a maikkan iti lima nga aldaw ti Duterte Youth a mangipila iti motion for reconsideration.
Saan pay a masinunuo no makapagtakemto met laeng ti Duterte Youth iti maika-20 a Kongreso, kalpasan a nalapdan ti pannakaiproklamarda kas nangabak, gapu kadagiti naipila a petision. (Dhel Nazario/Manila Bulletin//Lito Hilidon/Bannawag)
