Inyebkas ni Senate President Pro Tempore Jinggoy Ejercito Estrada ita nga aldaw, Hunio 18, ti panangsuportarna iti reporma nga ipatpatungpal ti kaddutok a hepe ti Philippine National Police (PNP) a ni Gen. Nicolas Torre III, ket kinuna a nabayagen a rumbeng a mapasayaat ti panagresponde dagiti polis.
Segun ken ni Estrada, a daulo ti Senate Committee on National Defense and Security, Peace, Unification and Reconciliation, a masapul nga agsubli ti panagtalek ti publiko kadagiti polis ti pagilian.
Nupay adda panagkedked ni Estrada iti pannakadutok ni Torre idi damo, kinuna ti senador a bambantayanna ti panagbalbaliw ti annuroten dagiti puersa ti polis iti pagilian nga impatungpal ni Torre ket inaklonna a masapul ti pannakarepaso dagiti opisial iti kastoy a tiempo.
Kinuna ni Estrada a dagiti inaramid ni Torre ti mangipakita iti nauneg a pannakaawatna iti kasapulan unay a pannakarepormar ti PNP. (Hannah L. Torregoza/Manila Bulletin//Lito Hilidon/Bannawag)
