Namakdaar ti Commission on Elections (COMELEC) nga awan kinaagpaysona ti agwarwaras iti social media a pinugas kano ti COMELEC ti amin a files nga adda pakainaiganna iti 2025 National and Local Elections (NLE).
Iti paskil ti COMELEC iti Facebook page-na idi Hunio 18, inlawlawag ti COMELEC a dagiti napugas a files ket soft copies ti Ballot Faces, Accountable Forms, ken Voter Information Sheets (VIS) iti 2025 NLE nga adda iti National Printing Office (NPO) Data Servers.
Naisayangkat ti panangpugas (data deletion) idi Hunio 17, 2025 kas panangtungpal iti sagudayen ti Data Privacy Act of 2012 wenno RA 10173.
Segun ken ni Commissioner Rey E. Bulay, Commissioner-in-Charge ti Ballot Printing Committee, naaramid ti panagpugas iti files iti opisina ti NPO iti Quezon City kas mayannurot iti COMELEC en banc Resolution a naaprobaran idi May 27, 2025.
Kasapulan ti natibker ken nainkalintegan a pagtaktakderan iti parikut iti WPS --NMC
Inyunay-unay met ti COMELEC nga adda arkibo ti files ti 2025 NLE iti ikut ti COMELEC ken saanda a pugasen dagitoy.
Impalagip met ti COMELEC a ti panang-delete-da kadagiti file iti NPOD Data Servers ket paset ti regular nga aktibidad ti COMELEC a maar-aramid kalpasan ti tunggal eleksion, ken kas panagleppas ti operations ti Ballot Printing Committee.
Kuna ti COMELEC a napateg a paset daytoy ti data protection ken transparency measures ti COMELEC, a masapul a mapugas dagiti file iti NPO Data Servers tapno masigurado nga awan mabati a files iti database ti NPO. Ken gapu ta nalpasen ti May 12, 2025 NLE, masapul a masigurado nga awanen ti kabaelan ti asino man nga adda iti NPO a makaimaldit manen iti opisial a balota ken accountable forms, pati ti VIS nga addaan iti personal nga impormasion dagiti botante.
Sinigurado met ti COMELEC a tapno transparent ken accountable ti data deletion, personal nga inatendaran daytoy dagiti pannakabagi manipud iti Commission on Audit, election stakeholders, political parties, ken media. (rva)
