Nupay pinasingkedan ti Malakanyang a saan a makibiang ni Presidente Ferdinand Marcos Jr. iti impeachment trial ni Bise Presidente Sara Duterte, dinagadagna ti Senado a mangbigbig iti kiddaw ti Makati Business Club (MBC) nga ituloydan ti impeachment trial.
Daytoy ti kinuna ni Undersecretary ti Presidential Communications Office (PCO) Claire Castro iti naangay a Palace briefing idi Hunio 18.
Itay kallabes, dinagadag ti MBC ti Senado nga aramidendan ti impeachment trial ni Duterte, ket impaganetgetda a no saan a suroten dagiti senador ti linteg, saan a makaallukoy iti foreign ken local investor ti sektor ti negosio ti pagilian.
Inanamongan ni Castro ti kinuna ti MBC nga agkedked dagiti investor nga agpuonan iti Filipinas iti baet ti makapadanag a situasion, idinto a pumimpintasen ti ekonomia ti Filipinas, kasungani ti imbaga ni Duterte a bimmaba ti ekonomia.
Kasapulan ti natibker ken nainkalintegan a pagtaktakderan iti parikut iti WPS --NMC
Dinakamat ni Castro a naikkaten ti Filipinas iti grey list ti Financial Action Task Force (FATF), a nangpatibker iti panagtalek dagiti investor iti Filipinas, kasta met ti imbaga ti Asian Development Bank (ADB) a napagtalinaed ti Filipinas ti natibker a masakbayan ti ekonomia para iti 2025.
Innayon ni Castro a dagiti mapaspasamak iti Senado ti mangted iti saan a nasayaat nga epekto iti ekonomia ti pagilian. (Betheena Unite/Manila Bulletin//Lito Hilidon/Bannawag)
