Iti laksid ti karit ti panagraira ti palso nga impormasion ken makadadael a content, nagtalinaed ti Manila Bulletin a maysa kadagiti mapagtalkan a media brand iti Filipinas, segun iti 2025 Digital News Report nga impablaak ti Reuters Institute for the Study of Journalism.
Impakita ti report nga 62 a porsiento dagiti respondente ti nagkuna nga agtalekda iti Manila Bulletin.
Sangapulo a porsiento laeng ti nagkuna a dida agtalek iti Manila Bulletin, idinto a 28 a porsiento ti neutral.
Nairaman ti trust rating dagiti dadduma pay a media brand kas iti GMA Network (67 a porsiento), Philippine Daily Inquirer (63 a porsiento), TV5 (61 a porsiento), Philippine Star (61 a porsiento), DZBB (61 a porsiento), ABS-CBN (60 a porsiento), DZRH (59 a porsiento), TeleRadyo (57 a porsiento), regional wenno local newspapers (55 a porsiento), Radyo Pilipinas (54 a porsiento), SunStar (52 a porsiento), PTV (51 a porsiento), Abante/Abante Tonight (46 a porsiento), ken Rappler (43 a porsiento).
Kasapulan ti natibker ken nainkalintegan a pagtaktakderan iti parikut iti WPS --NMC
Segun iti Reuters Institute, natibker latta ti sapasap a panagtalek iti damag sipud idi nagleppas ti panagakem ni Rodrigo Duterte kas presidente idi 2022.
Napaliiw ti report a dagiti pagiwarnak a maibilang a mangbabbabalaw kadagiti adda iti turay ti masansan a saan a pagtalkan dagiti partisan audience ken puntiria ti coordinated harassment.
Impaganetget ti Reuters Institute a dagitoy a bilang ti mangipakita iti bukod a kapanunotan ti publiko ken saan a maibilang nga objective a pangrukod iti kinaumisu ken kalidad dagiti content. (Ellalyn De Vera-Ruiz/Manila Bulletin//Lito Hilidon/Bannawag)
