Inlaksid ti kangatuan a daulo ti Iran a ni Ayatollah Ali Khamenei idi Hunio 18 ti yaw-awag ti Estados Unidos (US) nga isusuko ti Iran ket imballaagna nga ania man a pannakairaman ti militar ti Amerika ket mangpataud iti nakaro a pannakadadael kadakuada.
Daytoy ti maikadua a panagparang ni Khamenei iti publiko sipud nangrugi ti panangraut ti Israel iti Iran, ken kalpasan ti indagadag ni Presidente ti US Donald Trump nga "unconditional surrender" iti paskil daytoy iti social media ken binallaaganda ni Khamenei nga ammo ti US ti yanna ngem saanda pay a gandat a papatayen ita.
Idi damo, inyadayo ni Trump ti bagina iti kellaat a panangraut ti Israel idi Biernes, Hunio 13, a nangpataud iti risiris, ngem iti kallabes, impasimudaagna ti pannakiraman ti Amerika, ta adda kaykayatna ti kastoy ngem ti ceasefire.
Saan nga inkankano ni Khamenei dagiti pangta ken di nainkalintegan a sasao ni Trump.
Estados Unidos, immikkat iti WHO
Segun ken ni Khamenei, dagiti makaamm-ammo iti Iran ken dagiti umilina, ken iti historiana, saanda a makisarita nga agusar iti pangta, ta saan a sumuko ti pagilian ti Iran.
Kinuna ti Israel a rinautda ti Iran tapno malapdan ti panangaramidda iti nuclear weapon. Ngem impaganetget ti Iran a para iti kappia ti nuclear program daytoy.
Kinuna ni Embahador ti Iran iti Geneva Ali Bahreini nga agtultuloy latta ti Iran a mangpataud iti uranium kas maitutop iti kasapulanda para iti kappia, ket agtultuloy ti panagtrabaho dagiti sientistada. (Associated Press/Manila Bulletin//Lito Hilidon/Bannawag)
