Indeklarar ti Commission on Elections (Comelec) Second Division a ni outgoing Manila 6th district Rep. Bienvenido Benny Abante Jr. ti nangabak a kas kameng ti Kamara a mangibagi iti sixth district ti Siudad ti Manila.
Pinatgan ti Comelec Second Division ti petision ni Abante a nagkiddaw a masuspenso ti epekto wenno mawaswas ti pannakaiproklamar ti kasalisalna a ni Luis "Joey" Chua Uy.
Iti petision ni Abante, kinunana a saan a natural-born Filipino ni Uy a nayanak idi 1962. Imparangna dagiti dokumento a mangipaneknek nga Intsik dagiti dadakkel ni Uy ket nagun-od laeng ti amana ti Filipino a citizenship babaen ti pannaka-naturalized-na idi 1967.
Segun iti Comelec Second Division, saan a natural-born, no di ket naturalized, ni Uy.
Pagalagadan iti MAIFIP mainaig iti pannakaiparit ti guarantee letter, iruar ti DOH inton Pebrero
Kinuna ti Second Division a maibilang a biddut ti deklarasion a sinapataan ni Uy iti certificate of candidacy (CoC)-na nga isu ket natural-born Filipino citizen, ket kaipapananna, a palso ti indeklararna iti CoC-na a maibilang a material representation maibatay iti Section 78 ti Omnibus Election Code.
Gapu iti daytoy, inkeddeng ti Second Division a saan a kandidato ni Uy, ket "void ab initio" ti CoC-na.
Ngem kinuna ni Comelec Chairman George Erwin Garcia nga agingga nga awan pay ti pinal a desision ti Comelec en banc, agakem latta ti naiproklamar iti maika-20 a Kongreso.
Inlawlawag ni Garcia nga agbalin nga executory ti desision ti Comelec en banc lima nga aldaw kalpasan a maipaulog daytoy. (Dhel Nazario/Manila Bulletin//Lito Hilidon/Bannawag)
