Kinemmeg dagiti polis ti dua a lallaki a mapapati a nangpapatay iti maysa a kagawad ti barangay, iti Brgy. Palca, Tuao, Cagayan idi agsapa ti Huebes, Hunio 19.
Kinuna ni Police Col. Mardito G. Anguluan, Cagayan police provincial director, a natiliw dagiti suspek iti hot-pursuit operation iti Brgy. Bagumbayan, Tuao, sumagmamano nga oras kalpasan ti insidente.
Binigbig dagiti polis ti biktima a ni Rodrigo Dupitas, 58, kagawad ti Barangay Angang, Tuao.
Segun iti imbestigasion, agawiden da Dupitas ken ti asawana a naglugan iti modified tricycle manipud iti baro a market site iti Tuao idi asitgan ida dagiti suspek a nakamotorsiklo ket pinaltoganda ti biktima, iti alas 7:55 ti bigat.
Farm specialist iti Abra, napaltogan
Nasugatan ti ulo ken tengnged ni Dupitas ken naideklarar a natayen iti nakaitarayanna nga ospital.
Saan a nasugatan ti asawa ti biktima ket inladawanna dagiti suspek-–ti driver ti motor ket nakasuot iti nalabaga a sweat shirt idinto a ti gunman ket nangisit a kamisadentrona. Agpada dagitoy a naka-helmet.
Kinamat dagiti polis dagiti suspek ket nakemmegda ida.
Kinuna ni Anguluan a residente iti Zamboanga del Norte dagiti di pay nainaganan a suspek, a nipasidong iti medical ken paraffin examinations ken maidarum kadagiti maitutop a kaso. (Freddie Lazaro/MB)
