Maipaayan iti seguridad ti suspek a nangibutaktak a naitanem dagiti bangkay dagiti 34 a mapukpukaw a “sabungeros” (mammallot) iti Taal Lake iti Batangas, kinuna ti Philippine National Police (PNP) idi Huebes, Hunio 19.
“Nakasagana ti PNP a mangipaay iti police assistance, a pakairamanan ti seguridad iti daytoy timpuar a baro a saksi,” kinuna ni PNP spokesperson Brig. Gen. Jean Fajardo iti maysa nga interbiu.
Inadmitir ti suspek, a maysa kadagiti innem a security guard iti Manila Arena, iti interbiu ti GMA News idi Hunio 18, a natayen dagiti “sabungeros” ken mapapati a nabekkel dagitoy babaen ti alambre sakbay a naitapuakda iti dan-aw.
Kinuna ni Fajardo a masapul a mangaramid iti affidavit ti suspek, a nabigbig laeng a kas “Totoy,” kas paset ti legal a wagas para iti case build-up.
Luistro: Mabalin a luktan manen ti Senado ti impeachment ni VP Duterte no paboran ti SC ti MR ti Kamara
“Masindadaan ti PNP Chief (Gen. Torre) a mapan idiay Taal Lake tapno ammuenna no sadino ti eksakto a lokasion nga imbagana (suspek) ta no Taal Lake, narikut ta nauneg ti dan-aw ket mabalin a kasapulan dagiti diver ket lumasat iti proseso,” kinuna ni Fajardo.
Kinuna pay ni Fajardo a nasayaat no makikoordinar ti TV network ken ti suspek iti PNP tapno tumulong a mangrisut iti kaso, nga impasiguradona a nakasagana dagiti polis a mangipaay iti seguridad.
Kabayatanna, kinuna ni Justice Secretary Jesus Crispin Remulla a mabalin nga agusar dagiti forensic investigator kadagiti technical diver tapno maberipikar ti impormasion (nga imbaga ti suspek).
“Mabalin a talaga a kasapulan ti technical diver, tapno maammuan ti kinapudno ti impormasion, gapu ta adalem dayta, ken saan a nalaka ti bumatok iti dan-aw tapno agsapul kadagiti bangkay ti tao,” kinuna ni Remulla.
Kinunana nga "aramiden dagiti imbestigador ti amin a kabaelanda a mangsapul kadagiti bangkay.” (Christopher Lloyd Caliwan, Benjamin Pulta/PNA)
