Mabalin latta a maipila ti kaso a kriminal, a pakairamanan ti plunder ken malversation kontra ken ni Bise Presidente Sara Duterte uray no maabsuelto iti Senate impeachment court.
Daytoy ti kinuna ni House prosecution panel spokesman Atty. Antonio Bucoy iti maysa nga interbiu idi Huebes, Hunio 19. Segun ken ni Bucoy, "uray no makedngan (ni Duterte) iti guilty wenno not guilty, uray no maabsuelto, mabalin pay la a maidarum iti plunder, malversation, panagpasuksok, ken dadduma pay. Nalawag dayta iti Konstitusion."
Segun pay ken ni Bucoy, saan a makalapped ti pangngedeng a not guilty iti panangidarum ti gobierno iti maysa nga impeached official iti plunder, panaglabsing iti Republic Act No. 3019 as amended para iti malversation iti babaen ti Revised Penal Code ken dadduma pay, kinunana a ti dakdakamatenna ket ti Anti-Graft and Corrupt Practices Act.
Patien ti 11-a kameng a House prosecution team a makaalada iti conviction kontra ken ni Duterte maibatay iti pito nga articles of impeachment nga insubmitirda iti Senado idi Pebrero 5.
Kasapulan ti natibker ken nainkalintegan a pagtaktakderan iti parikut iti WPS --NMC
Mairaman kadagiti alegasion a naipila kontra ken ni Duterte ti malversation ti ₱612.5 a milion a confidential funds.
Kuna ni Bucoy nga ipaay ti Konstitusion ti impeachment kas mekanismo para iti accountability dagiti opisial ti publiko.
"Awan pannakaibalud dita, awan sibil a danios," kinuna ni Bucoy. "Ti nadagdagsen a dusa dita ket ti pannakaikkat iti opisina a publiko ken agnanayon a diskualipikasion iti opisina a publiko." (Ellson Quismorio/MB)
