Kinompirmar ti Philippine Coast Guard (PCG) idi Biernes, Hunio 20, a pinagtignaydan dagiti technical diver para iti posible a search and retrieval operation nga iwayatda iti Taal Lake iti Batangas, a maipagarup a nakaibellengan dagiti bangkay ti 34 a mapukpukaw a "sabungeros" (mammallot).
Binilin ni Commandant ti PCG Admiral Ronnie Gil Gavan ti Coast Guard Special Operations Force (CGSOF) a makikoordinar iti Department of Justice (DOJ), National Bureau of Investigation (NBI), ken iti Philippine Navy (PN) para iti napardas ken estratehiko a pannakaipanan dagiti technical diver tapno mapatalgedanda no agpayso nga iti Taal Lake ti nakaitaneman dagiti mapukpukaw a mammallot.
Itay kallabes, nagsao ti maysa nga akusado iti kaso dagiti mapukpukaw a mammallot, ket imbutaktakna iti GMA News a natayen dagiti mammallot ken naibelleng ti bangkayda iti Taal Lake. Innayon pay ti naakusaran a nabekkel babaen ti barut agingga a natay dagiti mammallot sakbay a naibellengda iti dan-aw.
Saanna a ninaganan dagiti utek iti likudan ti pammapatay, ngem kinunana a mabalin a nasurok a 100 a mammallot ti napapatay, a saan a laeng a 34, segun iti datos ti Philippine National Police (PNP). Kinunana a mangidatag iti affidavit kadagiti autoridad tapno ilanadna amin nga impormasion nga ammona mainaig iti kaso.
Pagalagadan iti MAIFIP mainaig iti pannakaiparit ti guarantee letter, iruar ti DOH inton Pebrero
Gapu iti daytoy, insingasing ni Sekretario ti DOJ Jesus Remulla a kasapulan dagiti technical diver ti PCG ken Navy tapno mapatalgedanda ti impormasion.
Nagpukaw dagiti mammallot iti nagbaetan ti Abril 2021 agingga iti Enero 2022 kadagiti nadumaduma a cockfighting arena ken iti pagtaengan dagiti biktima iti Laguna, Batangas, Manila, ken Bulacan. (Martin Sadongdong/Manila Bulletin//Lito Hilidon/Bannawag)
