Inkalintegan ti envoy ti Israel iti Manila ti panangatakar ti Israel iti Iran, a nangpakaro iti sabali manen a panagsusupiat iti rehion, babaen ti panangibagana nga inaramidda daytoy kas sungbat kadagiti pangta--ken uray pay kadagiti panagtignay--ti rehimen ti Iran a mangungaw iti sibubukel a nasion dagiti Hudio.
Binomba ti Israel idi Hunio 13 dagiti kangrunaan a pasilidad ti militar ken nuklear ti Iran, a nangimarka iti umuna a direkta a komprontasion dagiti dua a nabileg ti militarna a pagilian iti Middle East sipud idi Oktubre 7, 2023--idi inwaragawag ti Israel ti gubat maibusor iti Hamas, maysa a militante nga organisasion a mapapati a pomponduan ti Iran.
Simple laeng met ti sungbat kadagita, kinuna ni Embahador ti Israel iti Filipinas Ilan Fluss, iti pannakisaritanna kadagiti agiwarwarnak a Filipino idi Martes, Hunio 24.
Kinuna ni Fluss a nalawag nga inwaragawag ni Iranian Supreme Leader Ali Khamenei iti publiko ti panggepna a mangungaw iti Israel, a dina pay ketdi binigbig a kas maysa nga estado.
Pagalagadan iti MAIFIP mainaig iti pannakaiparit ti guarantee letter, iruar ti DOH inton Pebrero
Kadagiti bulan sakbay ti sorpresa a panangatakar ti Israel, kinuna ni Fluss a pinapardas ti Tehran ti panangpasudina iti uranium, a dimmanonen iti 60 a porsiento nga umdasen a mangpataud iti dandani sangadosena a bomba atomika.
Napaayen dagiti internasional a panangiganett a mangpasardeng iti daytoy a sayangkat ti Iran, kinuna ni Fluss, a nangiruar ti International Atomic Energy Agency (IAEA) iti report a lablabsingenen ti Iran ti Non-Proliferation Treaty (NPT).
“Daytoy a panangiganetget a panangpasudi iti uranium iti kasta a lebel ket napapardas iti napalabas a tallo a bulan, ket iti uneg ti tallo laeng a bulan, nabaelanda a pinaadu daytoy manipud iti umdas iti innem a bomba agingga iti umdas para iti siam a bomba iti tallo a bulan,” kinuna ni Fluss.
“Adda kadakami amin nga ebidensia a pappapardasen ti Iran ti programana iti panagaramid iti igam (manipud iti nuklear). Isu a napaaduda ti panagaramidda iti igam iti napalabas a sumagmamano a bulan,” innayonna.
“Maysa pay, pimmardas met ti programa ti Iran iti ballistic missile. Manipud iti panangpartuatna iti 100 a missile iti makabulan, pinaadu ti Tehran ti produksionna agingga iti 300 iti makabulan,” kinuna ni Fluss.
“Addada iti proseso ti panangpaadu iti 300 a missile iti kada bulan, a panggepda ti maaddaan iti nasurok a 10,000 a missile. Saludsodem iti bagim, apay a 10,000 a missile? Saan nga adu a pagilian ti addaan iti kasta kaadu a missile,” innayonna.
Napaliiw met ti envoy ti Israel ti agtutunos a programa kadagiti proxy ti Iran iti entero a Middle East--ti Hamas iti Gaza, Hezbollah iti Lebanon, Houthi iti Yemen, ti Islamic Jihad ken ti dati a presidente ti Syria a ni Bashar al-Assad--tapno naan-anay a maungaw ti Israel.
“Iti kanito nga addaanen ti Iran iti nuklear nga igam, dimonton a masagid pay dayta,” kinunana.
“Kayatyo kadi nga agpakamatay ti Israel ken saan a sumungbat iti nadagem a pangta iti pannakaungawna?” sinaludsod ni Fluss.
Adda Impormal a saritaan ti Iran ken US maipapan iti nuklear a katulagan sakbay ti panangatakar ti Israel. Naituding nga angayen ti dua a pagilian ti maikanem a rikus ti negosasionda iti Oman inton Hunio 15, ngem naitantan daytoy idi inrugi ti Tel Aviv ti panangatakar iti Tehran, ti kangrunaan a lugar a pagpaspasudian iti uranium ti Iran iti Natanz, ken maysa a sentro ti panagsukisok iti nuklear idiay Tabriz.
Pinapatay met ti Israel dagiti kangatuan nga opisial ti militar ken nuklear a sientista ti Iran bayat ti panangatakarda.
Idi Hunio 21 (oras ti Washington), nakikadua met laeng ti US, maysa kaaliado ti Israel, iti gubat idi inusarna dagiti B-2 stealth bomber nga eroplanona a nangbomba kadagiti lugar ti nuklear ti Iran idiay Fordow, Natanz, ken Isfahan.
Kalpasanna, idi Hunio 23, nagibales met ti Iran babaen ti panangpabantona kadagiti missle iti base militar ti US idiay Qatar--a nangtignay kadagiti kabangibangna a pagilian a temporario a mangiserra kadagiti airspace-da. (Joseph Pedrajas/MANILA BULLETIN)
