Impasigurado ni Presidente Ferdinand Marcos Jr. iti publiko ita nga aldaw, Huno 25, a ti agtultuloy a panaggubat ti Israel ken Iran ket saan a nangpataud iti dakkel nga epekto iti ekonomia ti Filipinas, iti laksid ti maekspektar a panagngato ti presio ti gasolina.
Segun ken ni Marcos, nagsasarita dagiti kameng ti economic team ita nga aldaw tapno adalenda ti situasion, nangruna ti presio ti lana iti sangalubongan.
Kinuna ni Marcos a ngimmina ti lana iti US$79 kada bariles ngem nagsubli met laeng iti US$69 kalpasan a maideklarar ti ceasefire ti Israel ken Iran, a ingganetget ti Estados Unidos.
Nupay kasta, kinuna ni Marcos a bambantayan ti gobierno dagiti di nainkalintegan a pannakaingato ti gasolina kadagiti lokal a merkado, idinto a saan pay met a ngimmato ti presio ti lana.
Kasapulan ti natibker ken nainkalintegan a pagtaktakderan iti parikut iti WPS --NMC
Maipapan kadagiti ayuda a maipaay kadagiti drayber, mannalon, ken mangngalap, inlawlawag ti presidente a daytoy a tulong ket maipaay laeng no agpaut ti ingingina ti lana. (Argyll Cyrus Geducos/Manila Bulletin//Lito Hilidon/Bannawag)
