Inlawlawag ni Senate President Francis "Chiz" Escudero ita nga aldaw, Hunio 25, nga insubli ket saan a winaswas ti impeachment court ti Senado ti Articles of Impeachment kontra ken ni Bise Presidente Sara Duterte, maikontra iti argumento nga inusar ti depensa.
Iti kopia ti Answer Ad Cautelam nga indatag ni Duterte iti Senado nga agpapaay a kas impeachment court, kinuna ti kampo ni Duterte a gapu ta naisubli iti Kamara ti Articles of Impeachment, saan a ngarud a rumbeng a mairuar ti summons, ket saan met a mapilit ni Duterte a mangsungbat kadagiti alegasion a dinakamat ti Articles of Impeachment.
Innayon dagiti abogado ni Duterte a no awan ti Articles of Impeachment iti sidong ti impeachment court, ti panangpasungbat iti bise presidente ket kasla panangbilin iti maysa nga akusado a mangsungbat iti kaso a saan pay nga inkeddeng ti korte nga agtignay wenno mangawat.
Ngem iti maysa a press conference, impaganetget ni Escudero ti pammilin ti Senado, a nagkuna a ti pannakaisubli ti dokumento ket dina kaipapanan ti pannakawaswas wenno pannakaisardeng ti kaso, ta nabatad ti nailanad iti pammmilin ti "pannakaisubli a saan a mawaswas ti kaso."
Kasapulan ti natibker ken nainkalintegan a pagtaktakderan iti parikut iti WPS --NMC
Binilin ti impeachment court ti Kamara a patalgedanda a saanda a linabsing ti Article XI, Section 3, paragraph 5 ti 1987 Constitution nga agkunkuna nga “Awan ti impeachment proceedings ti maisayangket kontra iti isu met laeng nga opisial iti nasurok a maminsan iti uneg ti maysa a tawen,” agraman ti kasasaad ti immuna a tallo a naipila nga impeachment complaint.
Nagbobotosan pay dagiti senator-judge a patalgedan dagiti kameng ti Kamara iti maika-20 a Kongreso a kayatda ken sisasaganada nga ituloy ti impeachment complaint kontra iti bise presidente. (Dhel Nazario/Manila Bulletin//Lito Hilidon/Bannawag)
