Impalgak ti Department of Justice (DOJ) ita nga aldaw, Hunio 25, a kidkiddawen ti International Criminal Court (ICC) ti tulong ti gobierno ti Filipinas a masalakniban dagiti saksi nga agtestimonia a maibusor ken ni dati a presidente Rodrigo Duterte iti The Netherlands.
Segun ken ni Sekretario ti DOJ Jesus Crispin C. Remulla, addan opisial a waragawag a maikkan iti Witness Protection Program dagiti saksi nga agtestimoniar iti The Hague.
Impalgak ni Remulla nga impaayen ti DOJ ti tulong ken kooperasionna iti kiddaw a nainkalintegan.
Nakaditene ni Duterte iti The Hague gapu iti kasona a crimes against humanity iti ICC mainaig kadagiti extrajudicial killing a napasamak iti insayangkatna a war on drugs.
Iti sabali a bangir, sinupiat ni Remulla ti kiddaw dagiti abogado ni Duterte nga interim release ni Duterte iti maysa a pagilian a kameng ti ICC.
Panagwaras ti fake news iti pannakabista ti kaso nga impeachment ni Duterte, impakdaar ni Rep. Adiong
Segun ken ni Remulla, ammo unay ti ICC a narigatton a mapagsubli ni Duterte iti kanito a maparuar daytoy iti The Hague.
Innayon ni Remulla a saan a rumbeng a pagdanagan ni Duterte ti salun-atna iti The Netherlands ta nalalaing dagiti doktor sadiay a mangtaripato iti salun-atna. (Jeffrey Damicog/Manila Bulletin//Lito Hilidon/Bannawag)
