Pormal nga indatag ti prosekusion ti International Criminal Court (ICC) ti isusupiatna iti kiddaw nga interim release ni dati a presidente Rodrigo Duterte, gapu kadagiti ibagbagana iti publiko ken komentona, agraman dagiti pamiliana.
Iti dokumento a naipaskil iti website ti ICC idi Hunio 23, a pinirmaan ni ICC Deputy Prosecutor Mame Mandiaye Niang, pormal a kiniddaw ti prosecution iti ICC Pre-Trial Chamber I (PTC I) a dida koma patgan ti kiddaw ti depensa nga interim release ni Duterte.
Segun iti prosekusion, masapul ti agtultuloy a pannakaiditene ni Duterte gapu ta natugpal kenkuana dagiti constituent condition nga inkeddeng ti Article 58(1)(a), 58(1)(b)(i), 58(1)(b)(ii) ken 58(1)(b)(iii) ti Rome Statute, isu a supiatenda ti interim release ni Duterte iti di nadakamat a lugar.
Maysa kadagiti makaigapu iti panangsupiat ti prosekusion iti kiddaw ni Duterte nga interim release ket ti agtultuloy a di panangawat ti dati a presidente, ken ti pamiliana, iti legalidad ti proseso ti ICC kenkuana. Dinakamat ti prosekusion ti ibagbaga da Bise Presidente Sara Duterte, Veronica Duterte, dagiti abogadona, ken dagiti pasurotna, a kinidnap kano ti ICC ti dati a presidente.
Pagalagadan iti MAIFIP mainaig iti pannakaiparit ti guarantee letter, iruar ti DOH inton Pebrero
Dinakamat ti prosekusion ti insawang ni Duterte idi naarestar daytoy a "papatayendak laengen" sakbay a maidatag iti korte, ken sakbay ti pannakaarestarna, imballaagna iti publiko nga adda "panagrinnupak" ken kaykayatna laengen ti matay ngem iti maidatag iti ICC.
Impagunamgunam ti prosekusion a saan a maitunos daytoy a kababalin ti maysa a tao nga agsubli tapno agparang iti pannakabista it korte, ken mangparnuay iti panagduadua iti panagkumitna.
Impaganetget ti prosekusion nga adda latta impluensia dagiti Duterte iti politika ken iti internasional, kasta met ti pinansial a kasasaadna. Dinakamatda a pammaneknek dagiti nabileg a tattao a kakadua ni Duterte, ti anakna a bise presidente ti Filipinas, ken ni Sebastian Duterte nga agdama a bise mayor ti Siudad ti Davao.
Dinakamat ti prosekusion a kas pammaneknek iti impluensia ni Duterte iti politika ti panangabakna a kas mayor ti Siudad ti Davao uray adda iti detention.
Kinuna ti prosekusion a no mapatgan ti interim release ni Duterte, ad-addan ti pannakisaritana kadagiti kakadua ken pamiliana nga adda iti turay nga addaan iti bileg a mangriribuk kadagiti saksi, kas iti inaramidna idi presidente pay isuna.
Sinupiat ti prosekusion ti humanitarian grounds nga inusar dagiti abogado ni Duterte iti kiddawda nga interim release, ta saan laeng a daytoy ti kangrunaan a panangsukimat ti ICC iti Article 58 ti Rome Statute. (Raymund Antonio/Manila Bulletin//Lito Hilidon/Bannawag)
