Inyebkas ni kabbotos a Senador Benigno “Bam” Aquino IV ita nga aldaw, Hunio 25, ti kapanunotanna mainaig iti impeachment trial ni Bise Presidente Sara Duterte a masapul nga agdesision dagiti senator-judge maibatay iti ebidensia a maidatag iti Senate impeachment court.
Daytoy ti agkaykaysa a kapanunotanda kada kabbotos a Senator Francis “Kiko” Pangilinan ken Sen. Risa Hontiveros.
Segun ken ni Aquino, agpaay dagiti senador a kas senator-judge ket karbenganda a kitaen ti ebidensia ken dayta ti pagbatayanda a mangikeddeng, saanda nga agbatay iti maris ti politika.
Maipapan iti panagbalinda a tallo kada Pangilinan ken Hontiveros a kas minority bloc iti maika-20 a Kongreso, kinuna ni Aquino a mabalin pay nga agbaliw ti amin ita, ngem dagiti dati nga agkakadua ket agkakaduanto latta. Innayon ni Aquino a ti napateg ita ket matungpalda dagiti inkarkarida kadagiti tao idi panagkakampania.
Makabayan bloc, mangipila iti baro nga impeachment complaint kontra ken ni VP Duterte kalpasan ti one-year ban
Inaklon ni Aquino a makaskasaritada dagiti dadduma a senador maipapan iti liderato ti Senado, ngem maipalgakto ti desisionda kas maysa a grupo inton aglukat ti maika-20 a Kongreso inton Hulio 28, sakbay ti State of the Nation Address (SONA) ni Presidente Marcos. (Hannah L. Torregoza/Manila Bulletin//Lito Hilidon/Bannawag)
