Indauluan ni Presidente Ferdinand Marcos Jr. ti pannakapuor ti nasurok ₱9.48 a bilion a balor ti illegal a droga iti Clean Leaf International Corporation facility iti Barangay Cutcut, Capas, Tarlac idi Hunio 25.
Pinatalgedan ni Marcos ti panagkumit ti administrasionna a mangdadael kadagiti nasamsam nga illegal a droga, ket kinunana a di rumbeng a maisubli dagitoy a mailako kadagiti kalkalsada.
Segun ken ni Marcos, kayatna a mismo a makita ti proseso ti pannakadadael dagiti illegal a droga manipud pannakasamsam agingga iti pannakapuor dagitoy.
Kinunana a ti pagpuoran a mausar ket kabaelanna ti temperatura a 700°C ken agtalinaed nga aktibo iti las-ud ti 10 nga oras. Kalpasan daytoy, masapul a mapalamiis iti las-ud ti 12 nga oras, sa maaramid ti onsite confirmatory testing tapno masigurado nga awan ti natda a droga.
Kasapulan ti natibker ken nainkalintegan a pagtaktakderan iti parikut iti WPS --NMC
Ket no bilang adda mabati a bassit a droga, maulit ti proseso.
Impasingked ni Marcos ti pateg ti panagtalek ti publiko ken transparensia iti programa kontra iti droga, kangrunaan kadagiti kontrobersia iti napalpalabas a panang-recycle iti ebidensia ti droga.
Ti agdagup iti 1,530 a kilo ti droga ket nasamsam kadagiti agsasaruno nga operasion, agraman dagiti pannakaala kadagiti droga kadagiti baybay ti Luzon, a pakairamanan ti methamphetamine hydrochloride (shabu), marijuana, cocaine, ken ecstasy.
Sakbay ti pannakapuor, dimmalan iti confirmatory testing dagiti random sample iti PDEA National Headquarters tapno mapatalgedan ti pakabuklan dagiti illegal a droga.
Kadua ni Marcos dagiti nangato nga opisial ti Philippine Drug Enforcement Agency (PDEA), Department of the Interior and Local Government (DILG), Dangerous Drugs Board (DDB), Department of Justice (DOJ), ken Philippine Coast Guard (PCG) a nangimatang iti pannakadadael dagiti droga. (Argyll Cyrus Geducos/Manila Bulletin//Lito Hilidon/Bannawag)
