Binalusingsing ti Commission on Elections (Comelec) en banc ti pangngeddeng ti First Division a nangwaswas iti Certificate of Candidacy (COC) ni Marcelino “Marcy” Teodoro, kasta met ti pannakasuspenso ti proklamasionna.
Naala ni Teodoro ti kaaduan a botos para iti diputado ti 1st District ti Siudad ti Marikina kontra ken ni Senate Minority Leader Aquilino "Koko" Pimentel III, ngem naitantan ti pannakaiproklamarna gapu iti nakapila a kaso.
Maipalagip a pinatgan ti First Division ti Comelec ti petision nga indatag ni Pimentel, a mangwaswas iti COC ni Teodoro gapu iti maipagarup a material misrepresentation, ngem nagipila ni Teodoro iti motion for reconsideration a nagkiddaw a mangibabawi iti pangngeddengda.
Iti pangngeddeng ti Comelec en banc, kunada a saan a naipakita dagiti nagpetision nga adda intension wenno inuulbod a motibo ti respondente iti panangipilana iti COC-na bayat a naipila ti application-na.
Pagalagadan iti MAIFIP mainaig iti pannakaiparit ti guarantee letter, iruar ti DOH inton Pebrero
Kuna pay ti Comelec en banc nga umdas, mapagtalkan, ken natibker dagiti ebidensia nga indatag ni Teodoro a mangpaneknek a nainkalintegan ti panagsublina iti pagtaenganna iti Barangay San Roque, 1st District ti Marikina City, iti las-ud ti maysa a tawen kas mayanatup iti Konstitusion sakbay ti May 2025 Election.
Innayon ti Comelec en banc a ti deklarasion ni Teodoro a pagtaenganna iti COC ket naaramid iti naimbag a nakem, a paneknekan dagiti naruay a rekord ken affidavit, ken nakatungpal iti inkeddeng ti Konstitusion ken pagalagadan para iti agngayangay a kas kameng ti Kamara iti 1st District ti Marikina City. (Dhel Nazario/Manila Bulletin//Lito Hilidon/Bannawag)
