Makisarsarita ni Department of Transportation Secretary Vince Dizon iti media bayat ti maysa a komperensia iti opisina ti DOTr iti Siudad ti San Juan idi Hunio 13, 2025. Iti press briefing iti Malakanyang (Hunio 26), ingganetget ni Dizon ti publiko nga ireportda dagiti panagabuso a mainaig iti transportasion, ken innayonna a sisasagana ti DOTr a mangsalaknib kadakuada manipud iti posible a panangriribuk. (Ladawan: DOTr)

Makalaban ti kompania ti bus a GV Florida Transport Inc. ti gobierno no riribukenna ti netizen a nangi-upload iti viral video dagiti bus-da a mapapati a napardas unay ti panagpatarayda iti national highway, kinuna ni Department of Transportation (DOTr) Secretary Vince Dizon ita a Huebes, Hunio 26.

"Nalawag a harassment dayta. Binilinkon ti Land Transportation Franchising and Regulatory Board a bagaanda iti GV Florida a no ituloyda ti kaso kontra iti kaliantayo a nangi-upload iti video, sigurado a makalabanda ti sibubukel a DOTr ken ti entero a gobierno," kinuna ni Dizon kadagiti reporter ti Malakanyang iti maysa a briefing.

"Diak ammo no kayat ti kompania nga aramiden dayta, gapu ta talaga a dimi ipalubos. Maulit-ulit nga imbaga ti Presidentetayo nga aramidentayo ti amin tapno natalged dagiti kailiantayo kadagiti kalsada," innayonna.

Kinuna ni Dizon a mangipaay ti DOTr iti legal a tulong iti netizen, kalpasan a naipadamag a nagpangta ti GV Florida a mangipila iti kaso kontra iti video uploader, a pakairamanan ti cyber libel.

Nasional

Independent People's Commission, anti-political dynasty, party-list reform bill, prioridad ti Senado

Immunan nga imbilin ti DOTr ti pannakasuspenso ti prangkisa ti 15 a bus ti GV Florida Transport Inc. nga agserserbi iti ruta ti Santa Ana (Cagayan)-Sampaloc ken Baguio-Apayao iti 30 nga aldaw a nangrugi idi Hunio 11, wenno tallo nga aldaw kalpasan a nakita ti innem a bus-na iti viral video a mapapati nga aglulumba iti highway idiay Cordon, Isabela.

Inkari ni Dizon a salaknibanna ti video uploader ken impaganetgetna iti publiko nga agtultuloy a mangipadamag ken mangipatulod kadagiti video dagiti panagabuso a mainaig iti transportasion.

"Ket gapu ngarud iti dayta, igunamgunammi kadagiti kailiantayo a mangireport kadagiti panagabuso. Saantayo nga ipalubos ti kasta a panangriribuk maibusor kadagiti maseknan nga umilitayo a ti kayatda laeng met ket agreport ng panagabuso tapno nataltalged dagiti kailiantayo," kinunana.

"No makakitada iti panagabuso ken no mapasingkedan daytoy ti DOTr, sigurado nga agtignaykami a dagus maibusor kadagiti nagaramid iti panagabuso," innayon ni Dizon. (Ruth Abbey Gita-Carlos/PNA)