Sinupiat ti Office of Public Counsel for Victims (OPCV) ti International Criminal Court (ICC) ti interim release a kidkiddawen ni dati a presidente Rodrigo Duterte gapu iti posible a peggad ken riribuk nga aramiden dagiti kakadua ken pasurot ni Duterte kadagiti biktima ken saksi.
Indatag ti OPCV, a mangibagi kadagiti biktima ken saksi iti kaso ni Duterte a crimes against humanity, iti Pre-Trial Chamber I (PTC I) idi Hunio 25 ti panangsupiatda iti "Urgent Request for Interim Release” nga impila dagiti abogado ni Duterte.
Segun iti Principal Counsel dagiti biktima a ni Paolina Massidda, masapul nga agtalinaed ni Duterte iti detention gapu iti kinadagsen dagiti kasona ken gapu ta addan access ni Duterte iti dakkel a paset ti ebidensia iti rekord ti kaso ken iti pakabigbigan dagiti saksi.
Gapu iti kinarikut ti kasasaad ti seguridad iti Filipinas, aklonen ni Massidda a no mapatgan ti interim release ni Duterte, nakarkaron a madadael ti kinatalged, ken agbalin a dakkel a pakaseknan dagiti biktima ken saksi iti agdama a kaso, a dadduma kadakuada ket naipadamag a riniribuk ida dagiti pasurot ni Duterte.
Kasapulan ti natibker ken nainkalintegan a pagtaktakderan iti parikut iti WPS --NMC
Kinuna ni Massidda nga adda pay laeng impluensia ni Duterte iti politika, ket dinakamatna a kas pammaneknek ti panangabak ni Duterte a kas mayor ti Davao City ken dagiti rali nga isaysayangkat dagiti pasurotna iti The Hague.
Imparangarang ni Massidda nga adda latta iti turay dagiti annak ni Duterte a da Bise Presidente Sara, Davao City Mayor Sebastian Duterte, ken Davao City Rep. Paolo Duterte.
Innayon ni Massidda a nalatak dagiti Duterte ken adda pay laeng impluensiada iti Filipinas idinto nga adda dagiti pasuotna a mangipukpukkaw iti pannakawayawayana, agraman kadagiti rali iti The Hague.
Sinupiat met ti OPCV ti rason ti depensa a maipaay ti interim release ni Duterte gapu iti kinalakayna, nga agtawen itan iti 80.
Nagpakaasi ti OPCV iti PTC-1 a salaknibanda koma ti kinatalged ken sikolohikal ken pisikal a salun-at dagiti biktima ken saksi, ta isu laeng ti mangpasigurado a sanguen ni Duterte ti pannakausigna. (Raymund Antonio/Manila Bulletin//Lito Hilidon/Bannawag)
