Siam nga overseas Filipino workers (OFW) a nagawid manipud Middle East ti simmangpet iti Ninoy Aquino International Airport iti Siudad ti Pasay idi Hunio 24, 2025, a kaduada dagiti personnel manipud iti Overseas Workers Welfare Administration (OWWA). (Ladawan: OWWA Ilocos Regional Office)

Natalged a nakasubli iti Filipinas ti 9 nga overseas Filipino workers (OFW) manipud Pangasinan ken Ilocos Sur kalpasan a napagawid manipud iti Middle East, kalpasan ti tension iti nagbaetan ti Israel ken Iran.

Iti maysa a press statement idi Hunio 26, kinuna ti Overseas Workers Welfare Administration (OWWA)–Ilocos Regional Office a walo kadagiti OFW ti naggapu idiay Israel ken maysa ti naggapu idiay Jordan.

Naitrabaho ti panagawidda idi Hunio 24, iti laksid dagiti immun-una a pannakasinga dagiti flight iti temporario a pannakaserra ti airspace ti Qatar.

Naballigi a na-reroute dagiti flight-da ket simmangpetda iti NAIA Terminal 3 a kaduada da Department of Migrant Workers (DMW) Secretary Hans Leo Cacdac ken Undersecretary Venecio Legaspi.

Nasional

Kasapulan ti natibker ken nainkalintegan a pagtaktakderan iti parikut iti WPS --NMC

Tunggal OFW ket nakaawat ti ₱150,000 a tulong a pinansial (sag-₱75,000 manipud iti OWWA ken DMW), training vouchers manipud iti Technical Education and Skills Development Authority (TESDA), medical assistance manipud iti Department of Health (DOH), ken referrals para iti nayon a suporta ti Department of Social Welfare and Development (DSWD).

“Napadasanmi ti napaut a pannaka-delay ti flight gapu iti airspace restrictions ngem ti talaga a napateg ket nakaawidkamin a natalged ken nasayaat,” kinuna niCacdac iti maysa nga statement.

Impasigurado ni Cacdac kadagiti nagawid nga OFW a tulongan ida ti gobierno a mangbangon iti sustainable livelihoods wenno iti panagbirok iti baro a gundaway iti panggedan. (Hilda Austria/PNA)