Inyalud-od pay ni Alex Eala, 20, ti itatayaktakna iti grass court babaen ti 6-1, 6-2 a panagballigina kontra ken ni Dayana Yastremska ti Ukraine tapno makastrek iti semifinals ti WTA 250 Lexus Eastbourne Open iti Great Britain idi Huebes, Hunio 26 (oras iti Filipinas).
Iti panagay-ayamna iti naangin a kasasaad, impapati ni Eala ti nangipinget iti naiduma nga ay-ayamna tapno makaaramid iti sumagmamano a biddut ni Yastremska ket nagballigi ti Filipinas a mangrimbaw iti karibalna iti labanda iti quarterfinals a nagpaut laeng iti maysa nga oras.
Saanen a nakabalbales pay ti 25-anios nga Ukrainian, a nag-runner-up iti Nottingham Open iti nalabas a lawas, ta saanen nga ininggaan ti Filipina ti nakaskasdaaw a panagay-ayamna manipud rugi agingga iti ngudo-–porma a namnamaenna a mataginayon inton makisinnait iti Wimbledon inton maudi a paset daytoy a bulan.
Impasdek ti balligi ni Eala ti sumarunona a pannakidangadangana para iti semifinals kontra iti French a nayanak iti Rusia a ni Varvara Gracheva, nga addaan ranggo a maika-111 iti sangalubongan. (Mark Rey Montejo/MB)
