Mabalin nga agtalinaed a kas Senate President ni Senador Francis “Chiz” Escudero iti maika-20 a Kongreso, ngem mabalin pay nga agbaliw ti amin, kinuna ni Senador Alan Peter Cayetano idi Hunio 26.
Impalgak ni Cayetano nga ibotosna ni Escudero, ta mapnek iti nagapuanan ti Senado ita a tawen bayat ti panangidaulona.
"Awan ti perpekto a mayoria, awan ti perpekto a senador, ken Senate President," kuna ni Cayetano.
Segun ken ni Cayetano, no maaramid ti panagbobotos iti para Senate President ita wenno inton bigat, agtalinaed ni Escudero a kas daulo ti Senado.
Kasapulan ti natibker ken nainkalintegan a pagtaktakderan iti parikut iti WPS --NMC
Ngem iti sumaruno nga uppat a lawas, kinuna ni Cayetano a posible nga agbaliw ti panagkakadua ket maaddaan iti baro a kandidato ken baro a koalision, a kas gagangay a mapasamak agingga iti pormal a panaglukat ti Kongreso.
Nupay napintas a maysa nga abogado ti agpaay a Senate President gapu ta tamingen ti maika-20 a Kongreso ti impeachment trial ni Bise Presidente Sara Duterte, kinuna ni Cayetano a saan met unay a napateg daytoy. (Hannah L. Torregoza/Manila Bulletin//Lito Hilidon/Bannawag)
