Segun ken ni Alex Eala, 20, ti kaamnut ti panunot ti ultimo a tulbek iti panangabak kadagiti ay-ayam. Awitna ti pakasaritaan, magupgop amin ditoy a sipupuso ti siglat ken determinasion.
Nupay naruros iti second-set, naikagumaanna ti 7-5, 2-6, 6-3 a pinangatiw iti nainget a kasalisalna a French a maika-111 iti sangalubongan a ni Varvara Gracheva tapno makaagpang iti finals ti WTA 250 Lexus Eastbourne Open iti Great Britain, idi malem ti Biernes, Hunio 27 (oras iti Filipinas).
Itoy a panangabakna, nagbalin ni Eala a kaunaan a tennis player manipud iti Filipinas--iti agpadpada a men’s ken women’s division--a nakagteng iti championship round ti WTA Tour-level singles tournament.
Nakaimarkan ni Eala, maika-74 iti sangalubongan, iti rebbengenna iti WTA kalpasan a namindua a nakadanon iti semifinals--umuna iti Miami Open itoy met la a tawen a nagsanguanda ken Jessica Pegula ti US.
Kasapulan ti natibker ken nainkalintegan a pagtaktakderan iti parikut iti WPS --NMC
Para iti finals, sanguen ti Filipina ti maika-51 nga Australian a ni Maya Joint, a nangabak iti semifinals-da iti maika-53 a Russian a ni Anastasia Pavlyuchenkova, ita a Sabado, Hunio 28.
"Permi a ragsakko ta narikut daydiay a laban, adda dagiti narigat a gundaway a naglaing isuna (Gracheva) ket kasla diak kabaelan a sarangten," kinuna ni Eala. "Talaga a maragsakanak unay iti daytoy a panangabakko."
Naisangsangayan a panagdaliasat daytoy a balligi para ken ni Eala, a naggapu iti qualifying rounds a nangparmekanna iti American a ni Hailey Baptiste (6-7 (7), 7-6 (7), 6-1), ken iti Turkish a ni Zeynep Sonmez (6-1, 6-3).
Insarunona a kinimar da Italiana a Lucia Bronzetti (6-0, 6-1) ken Latvian a Jelena Ostapenko, iti round 32 ken 16; sa iti quarterfinals, linitakna ti Ukrainian a ni Yastremska (6-1, 6-2). (Mark Rey Montejo/MB)
