Bumasbassit ti bilang dagiti Filipino nga agkaskasar.
Segun iti Philippine Statistics Authority (PSA), mapan a 414,213 dagiti nairehistro a nagkasar idi 2023, bimmaba iti 7.8 a porsiento manipud iti 449,428 a nagkasar idi 2022.
Daytoy ti yaadu dagiti nagkasar kalpasan ti pandemia ngem mangipakita iti panagbaliw iti kapanunotan dagiti Filipino iti pormal a panagkallaysa.
Kinuna ti Commission on Population and Development (CPD) a nangadal iti datos, bimmassit ti bilang dagiti nagkasar gapu ta immadu ti bilang dagiti ag-live in.
Kasapulan ti natibker ken nainkalintegan a pagtaktakderan iti parikut iti WPS --NMC
Segun iti 2022 National Demographic and Health Survey (NDHS), immadu dagiti makikabkabbalay a babbai nga agtawen ti 15 agingga 49 manipud iti 5 a porsiento idi 1993 ket nagbalin a 19 a porsiento idi 2022.
Natakuatan met iti panagadal ti 2021 Young Adult Fertility and Sexuality (YAFS) a 12 a porsiento dagiti Filipino nga agtawen iti 15 agingga 24 ket addan live-in partner-da.
Naiparang daytoy iti bilang dagiti ubbing a nayanak iti ruar ti kasar.
Iparang ti datos ti PSA nga idi 2023, adda 842,728 ti nayanak a di nagkasar dagiti nagannak kadakuada, a maidasig iti 605,794 a panagpasngay manipud kadagiti nagkasar nga agassawa.
Kinuna ni Executive Director Undersecretary ti CPD Lisa Grace S. Bersales a ti panagbassit ti bilang dagiti nagkasar ti mangipakita iti panagbalbaliw, idinto nga adda nadumaduma a kita ti pamilia ita a panawen.
Innayonna a nupay pagtalinaedenda ti panagkasar a kas sagrado nga institusion, masapul a masalakniban dagiti dadduma pay a katulagan ken masigurado ti pagimbagan ti tunggal maysa, ken awan ti pamilia a mabaybay-an iti panagdur-as ti pagilian.
Impaganetget ni Bersales a ti pannakapatibker dagiti pamilia ti rumbeng a maipangpangruna uray ania a wagas ti pannakabukelda. (Jel Santos/Manila Bulletin//Lito Hilidon/Bannawag)
