Masapul nga urayen ti Office of the Ombudsman (OMB) ti resulta ti impeachment trial a maibusor ken ni Bise Presidente Sara Duterte iti impeachment court ti Senado sakbay nga agtignayda.
Daytoy ti kinuna ni Ombudsman Samuel R. Martires idi Hunio 27, idinto nga inlawlawagna nga mabalin laeng nga imbestigaren ti OMB ni Duterte, ngem saanda a mabalin nga idarum ta maysa nga impeachable official ti bise presidente.
Impaganetget ni Martires a masapul nga urayen ti OMB ti pagbanagan ti impeachment trial sakbay a makagunayda. No makombiktar ti bise presidente, mabalin nga ipila ti OMB, kasta met ti Department of Justice (DOJ), ti maitutop a kaso a kriminal kontra iti bise presidente. Ngem no maabsuelto ni Duterte, awan ti karbenganda a mangidarum.
Kinuna ni Martires a saan a mabalin na idarum ni Duterte ta impeacheble official daytoy, ket masapul nga agurayda agingga nga awanen ni Duterte iti saadna.
Pagalagadan iti MAIFIP mainaig iti pannakaiparit ti guarantee letter, iruar ti DOH inton Pebrero
Itay kallabes, inlawlawag ni Martires a rinugianen ti OMB ti proseso ti panagimbestigarda maibatay iti opisial a kopia ti Committee Report ti Kamara a naited iti opisinana.
Agleppas ti pito a tawen a panagakem ni Martires a kas Ombudsman inton Hulio 27.
Kinuna ni Martires, ania man ti pagbanagan ti impeachment trial ni Duterte, saan nga isu ti mangtaming iti resulta ti imbestigasion, no di ket ti sumukat kenkuana a kas Ombudsman. (Czarina Nicole Ong Ki/Manila Bulletin//Lito Hilidon/Bannawag)
