Maseknan ti Bureau of Immigration (BI) iti umad-adu a bilang ti Filipino nga illegal a mayap-apan iti Albania.
Segun iti BI idi Hunio 28, tallon a Filipino ti nasabet dagiti immigration officer iti Ninoy Aquino International Airport (NAIA) Terminal 3 ken nalapdan ti panagluganda iti eroplano a mapan iti Malaysia.
Nagpammarangda a kas turista idi damo ngem inaklonda met laeng nga adda nagkari kadakuada nga agtrabahoda iti Albania kas housekeeping attendant, factory worker, ken waiter.
Kinuna dagit tallo a Filipino a nagbayadda iti ₱34,000 agingga iti ₱74,000 kadagiti recruiter a nakontakda babaen ti Facebook Messenger.
Kasapulan ti natibker ken nainkalintegan a pagtaktakderan iti parikut iti WPS --NMC
Kalapsan a maipaw-itda ti bayad, kinuna ti BI nga im-block ti recruiter dagiti tallo a Filipino online, ken binaybay-anna ida nga awan ti ania man a bilin wenno balido a dokumento.
Segun iti Commissioner ti BI a ni Joel Anthony M. Viado, madlawda ti umad-adu a bilang ti illegal departure a mapan iti Albania ket saan nga isolated cases dagitoy.
Pinakaammuanen ni Viado ti Inter-Agency Council Against Trafficking (IACAT) maipapan iti daytoy tapno anayenda ti tignayda a mangtiliw kadagiti illegal recruiter. (Jeffrey Damicog/Manila Bulletin//Lito Hilidon/Bannawag)
