Mangrugi inton Hulio 18, ngumato ti inaldaw a kababaan a sueldo (minimum wage) dagiti mangmangged iti Metro Manila iti ₱695 kalpasan nga inaprobaran ti Regional Tripartite Wages and Productivity Board–National Capital Region (RTWPB-NCR) ti ₱50 a ngatuan ti sueldo, kas impalgak ti Department of Labor and Employment (DOLE) idi Lunes, Hunio 30.
Kinuna ni DOLE Secretary Bienvenido E. Laguesma a ti nasao a wage adjustment--a maibilang a kangatuan nga impaay ti RTWPB-NCR--ket pinasingkedan ti National Wages and Productivity Commission (NWPC) ken manamnama a mabenepisiaran ti agarup 1.2 milion a minimum wage earners iti Kamanilaan.
Iti babaen ti Wage Order No. NCR-26, mayaplikar ti isu met la a ₱50 kadagiti mangmangged iti sektor ti agrikultura, a mangingato iti inaldaw a kababaan a sueldoda manipud ₱608 iti ₱658.
Mayaplikar met laeng ti ₱608 iti ₱658 a rate ti sueldo kadagiti establisimiento ti retail and service nga addaan iti 15 wenno basbassit nga empleado, kasta met kadagiti kompania ti manufacturing nga addaan iti basbassit ngem 10 a regular a trabahador.
Kasapulan ti natibker ken nainkalintegan a pagtaktakderan iti parikut iti WPS --NMC
Ti nginatuan ti sueldo ket katukad ti binulan nga ingangato iti ₱1,100 para iti lima-nga-aldaw a lawas ti panagtrabaho wenno ₱1,300 para iti innem-nga-aldaw a lawas ti panagtrabaho.
Kaipapanan daytoy ti binulan a take-home pay a manipud ₱15,247 agingga iti ₱18,216, a pakairamanan dagiti mandatory benefit kas iti 13th month pay, service incentive leave, SSS, PhilHealth, ken Pag-IBIG.
Kinuna ni Laguesma nga inkonsiderar ti wage board dagiti economic indicator ti Metro Manila, a pakairamanan ti growth, inflation, ken employment data, iti pannakaipaulog iti baro a wage order.
Impaganetgetna a masapul a balansien dagiti wage board ti proteksion dagiti trabahador ken ti pannakasustiner ti negosio bayat a maitandudo ti panggedan ken produktibidad a di mangtignay iti implasion.
Manipud idi 2023, ti kababaan a sueldo iti NCR ket ngimmato iti dagup a ₱125.
Mangisayangkat ti DOLE iti kampania ti impormasion ken mapainget ti labor inspections tapno masigurado ti panangtungpal iti wage order. (Trixee Rosel/MB)
