Miniting ni Laoag Mayor Bryan Alcid dagiti city hall department head idi Lunes (Hunio 30, 2025), umuna nga aldaw ti panagtakemna, iti Laoag City Auditorium. Kinuna ni Alcid a kayatna a napardas ti disaster response iti siudad. (Ladawan: `City Government of Laoag)

Pormal a nagtugawen ti baro a mayor ti Siudad ti Laoag a ni Bryan Alcid, idi tengnga ti aldaw ti Lunes, Hunio 30, ket dagus nga impasdekna ti napardas a disaster response kas maysa kadagiti umuna a pammilin ti panagtakemna.

“Kayatko ti naparpardas a panagrespode no adda didigra,” kinuna ni Alcid bayat ti pannakilangenna kadagiti department head iti city hall.

Para iti daytoy, kinuna ni Alcid a magatang dagiti kasapulan a nayon a quick response equipment ken luglugan bayat ti panagturayna. Addanto met maiwayat a komprehensibo a panagsanay para kadagiti responder.

Iti umuna nga aldawna iti opisinana, pinirmaan ni Alcid ti Executive Order (EO) No. JBA 001-2025, nga inadaptarna ti tagline nga "Alisto, Asenso, Progreso!", nga isu ti islogan ti kampaniana idi eleksion.

Lokal

ITI ILOCOS SUR: Mannalon, binagkongna ti kabsatna

Sakupen ti EO ti amin a programa, proyekto, serbisio, ken aktibidad ti gobierno ti siudad ken ti administrasionna.

Kinuna ni Alcid a ti direksion ti administrasionna ket ti panangbangon iti gobierno a responsive, progresibo, ken naikumit nga agserbi kadagiti amin a Laoageño, kas maitunos iti "alisto" (quick response), "asenso" (growth and improvement), ken "progreso" (inclusive development).

Dinutokan met ni Alcid idi Hunio 30 ti baro nga administrador ti siudad a ni Atty. Ed Von Cid, ken nagpirma iti dua a memorandum: ti para iti pannakaipatungpal ti Real Property Valuation and Assessment Reform Act, ken ti maipapan iti nainget a panagdalus ken panangdisinpektar iti Laoag City Public Market.

"Daytoy ti pangrugian ti liderato a mapagtalkan, action-oriented, ken naipamaysa iti epektibo a panagserbi kadagiti umili ti Siudad ti Laoag,” kinunana. (Leilanie Adriano/PNA)