Ipawaswas ni Luis Joey Chua Uy iti Korte Suprema (SC) ti pangngeddeng ti Commission on Elections (Comelec) idi Hunio 30 a nangideklarar ken ni Bienvenido Abante Jr. kas nabotosan a kameng ti Kamara para iti maikanem a distrito ti Manila.
Nagsapata ni Uy iti sango ni Manila regional trial court Executive Judge Carolina Icasiano-Sison idi Mayo 26.
Idi Hunio 30, pinatalgedan ti Comelec en banc ti pangngeddeng ti Comelec second division idi Hunio 18 a nangwaswas iti pannakaiproklamar ni Uy a kas nabotosan a diputado gapu iti parikut iti citizenship daytoy.
Iti petition nga impila ni Uy iti SC, kiniddawna a masapul a mayawaten ti kaso iti House of Representatives Electoral Tribunal (HRET), saan nga iti Comelec a kas full commission.
Kasapulan ti natibker ken nainkalintegan a pagtaktakderan iti parikut iti WPS --NMC
Kiniddaw pay ni Uy iti SC a mangipaulog koma iti temporary restraining order (TRO) ken iti status quo order tapno agtalinaed dagiti maseknan a partido iti sigud a kasasaadda sakbay nga impaulog ti Comelec ti resolusion idi Hunio 18 ken Hunio 30.
Inlawlawag ni Uy iti SC a ti birth certificate ken marriage certificate nga indatagna ti mangipakita nga Intsik ti amangna, a nakagun-od iti Filipino citizenship babaen ti naturalization, ken natural-born Filipina ti inangna.
Segun ken ni Uy, dagitoy a dokumento ti mangpaneknek a natural-born Filipino isuna ken indeklararna daytoy nga awan gandatna a mangallilaw.
Dinakamat ni Uy panagakemna a kas councilor ti 6th District ti Manila iti sumagmamano a termino, a mangipakita iti nabayagen a panagserbina iti publiko.
Agsubli ti sesion ti SC iti Hulio 1 kalpasan ti makabulan a panangisurat kadagiti pangngeddeng, ngem saan nga ammo no tamingenda ti petision ni Uy iti dayta a sesion ti Kangatuan a Pangukoman. (Rey G. Panaligan/Manila Bulletin//Lito Hilidon/Bannawag)
