Isingasing ni Leyte 1st district Rep. Martin Romualdez iti maika-20 a Kongreso ti pannakailaksid dagiti minilion nga overseas Filipino workers (OFW) nga agbayad iti kontribusion iti Philippine Health Insurance Corp. (PhilHealth).
Gapu iti daytoy, impila ni Romualdez, a presidente ti partido a Lakas-Christian Muslim Democrats (Lakas-CMD), ti House Bill (HB) No. 2 idi Hunio 30, a mangpatibker iti healthcare system ti pagilian tapno mapasayaat ti panagsagana ti publiko para iti emerhensia ti salun-at.
Idi Hunio 30 ti umuna nga aldaw ti panangipila kadagiti gakat wenno singasing a linteg para iti maika-20 a Kongreso. Ni Romualdez ti nagpaay a House Speaker iti maika-19 a Kongreso.
Segun iti gakat, ibaklay ti nailian a gobierno ti kagudua ti bayadan dagiti OFW, ket bayadan ti employer ti OFW ti kagudua.
Makabayan bloc, mangipila iti baro nga impeachment complaint kontra ken ni VP Duterte kalpasan ti one-year ban
Malaksid iti panangikkat iti bayadan dagiti OFW iti PhilHealth, panggep ti gakat a linteg a makissayan dagiti kontribusion iti PhilHealth ken maiparit ti pannakayakar ti pondo daytoy iti national treasury.
Nagpaay a kas co-author ni Romualdez iti HB No.2 dagiti pannakabagi ti Tingog Party-list a da Rep. Andrew Julian Romualdez ken Rep. Jude Acidre. (Ellson Quismorio/Manila Bulletin//Lito Hilidon/Bannawag)
