Inawagan ti Department of Education (DepEd) a kas "fakenews" ti naipaskil iti social media nga agkunkuna nga agnayonda iti klase iti Sabado para kadagiti estudiante manipud elementaria aginga iti highschool.
Inlawlawag ti DepEd nga awan ti naaprobaran wenno naipakaaammo a kastoy a polisia.
Iti maysa a paskil ti social media ita nga aldaw, Hulio 2, inggunamgunam ti DepEd ti pakdaarna a maibusor iti panagwaras ti palso wenno makatikaw nga impormasion, ket pinalagipanda ti publiko nga agridam, agannad, ken agamiris iti panangilasinda iti ania man a kita ti impormasion.
Dinagadag ti DepEd ti publiko nga agpannurayda laeng kadagiti napatalgedan a pagtaudan ti pakaammo maipapan iti edukasion. Makita dagiti opisial nga impormasion babaen ti beripikado a social media account ken ti opisial a website ti DepEd. (Ellalyn De Vera-Ruiz/Manila Bulletin//Lito Hilidon/Bannawag)
