Nupay saan pay a dinakamat ni Presidente Ferdinand Marcos Jr. ti maipapan iti panagsubli ti Filipinas iti International Criminal Court (ICC), dengdenggenna ti kapanunotan ti publiko mainaig iti daytoy.
Daytoy ti kinuna ni Undersecretary ti Presidential Communications Office (PCO) Claire Castro idi Hulio 1, iti saludsod no maallukoy met laeng ti presidente nga agsubli a kas kameng ti ICC ti Filipinas kalpasan a rimmuar ti surbey a nasurok a kagudua dagiti Filipino ti umanamong iti pannakipagkameng manen ti Filipinas iti ICC.
Segun iti Tugon ng Masa survey nga inwayat ti Octa Research manipud Abril 22 agingga 24, 57 a porsiento dagiti Filipino ti umanamong iti panagsubli ti Filipinas iti ICC, idinto a 37 a porsiento ti sumupiat iti dayta a kapanuotan.
Itay napan a bulan, impaganetget ti Malakanyang a silulukat ni Marcos iti panagsasarita maipapan iti panagsubli ti Filipinas iti ICC, ngem saan pay a napagsasaritaan daytoy.
Kasapulan ti natibker ken nainkalintegan a pagtaktakderan iti parikut iti WPS --NMC
Idi 2024, kinuna ni Marcos nga ad-adalenda no mabalin a makipagkameng manen ti Filipinas iti ICC ken kitaenda no ania dagiti mabalin a pagpilian ti pagilian.
Malagip nga inkalikagum ti gobierno ti Filipinas, iti babaen ti administrasion ni dati a presidente Rodrigo Duterte, ti panaglusulosna iti Rome Statute idi Marso 14, 2018, agarup makabulan kalpasan nga inrugi ti ICC ti umuna nga imbestigasionna iti kasasaad idi ti pagilian. Nagbalin a pinal ti yiikkat ti Filipinas iti ICC idi Marso 16, 2019. (Betheena Unite/Manila Bulletin//Lito Hilidon/Bannawag)
