Reprepasuen ni Presidente Ferdinand R. Marcos Jr. ti komprehensibo a report nga indatag ti Local Water Utilities Administration (LWUA) maipapan iti PrimeWater Infrastructure Corp., a kukua ti pamilia Villar, gapu iti kaadu ti reklamo kontra iti serbisio daytoy.
Impalgak ni Undersecretary ti Presidential Communications Office (PCO Claire Castro idi Hulio 1 nga indatagen ti LWUA ti detalyado a folder ken dua a balikbayan box a naglaon kadagiti dokumento mainaig iti operasion ti PrimeWater.
Impasigurado ni Castro iti publiko nga isagsaganan ti Malakanyang dagiti legal nga addang a kas sungbat kadagiti natakuatan ti LWUA. Innayonna a mayannatup iti linteg ken para kadagiti umili ti aramidenda.
Iti kallabes, adu ti reklamo a maibusor iti PrimeWater, nga agtartaray babaen ti joint venture agreement kadagiti sumagmamano a local water district, gapu iti pannakasinga ti serbisio ken pannakaawan ti suplay ti danum kadagiti nadumaduma a probinsia iti pagilian.
Kasapulan ti natibker ken nainkalintegan a pagtaktakderan iti parikut iti WPS --NMC
Naidatag ti report ti LWUA kalpasan ti kiddaw dagiti opisial ti lokal a gobierno ken consumer groups a repasuen koma ti gobierno ti public-private partnership iti pannakaipaay iti serbisio ti danum. (Darryl John Esguerra/PNA//Lito Hilidon/Bannawag)
