Baro a Kongreso, baro a gakat a mangipakat iti diborsio
Saan a nagtaktak dagiti kameng ti Kamara iti maika-20 a Kongreso a nangipila iti gakat a linteg a mamagbalin a legal iti diborsio para kadagiti agassawa nga awanen namnamada nga agsinnublianan.
Dua ti gakat a linteg a naipila iti Kamara: ti House Bill (HB) No.108 (An Act Reinstituting Absolute Divorce as an Alternative Mode for the Dissolution of Marriage) nga impila ni 4Ps Party-list Rep. JC Abalos, ken ti HB No.210 (An Act Reintroducing Divorce in the Philippines) nga impila da ACT Teachers Party-list Rep. Antonio Tinio ken Kabataan Party-list Rep. Renee Co.
Narikut a pagsasaritaan ti diborsio iti Filipinas, a kaaduanna ti Katoliko, ket isu laengen ti maysa kadagiti sumagmamano a pagilian iti sangalubongan a mangiparit iti diborsio.
Kasapulan ti natibker ken nainkalintegan a pagtaktakderan iti parikut iti WPS --NMC
Ngem idi napalabas a maika-19 a Kongreso, nabaelan ti Kamara nga aprobaran ti gakat a mangipalubos iti diborsio iti maikatlo a pannakaibasa, ngem saan a naggaraw daytoy iti Senado.
Ti Abalos Bill (HB No.108) ti makunkuna a "pro-women" a linteg ta iti kaaduan a kaso, ti babai ti maikkan iti karbengan a makidiborsio tapno mawayawayaan daytoy iti maysa nga abusado a relasion ken tumulong kenkuana a mangisubli iti dayaw ken panangipategna iti bagina.
Segun iti HB No.108, maipakat ti absolute divorce no mapaneknekan nga awanen namnama nga agsinnublianan dagiti agassawa.
Iti sabali a bangir, panggep ti HB No.210 nga isubli ti diborsio a kas maysa a pagpilian a naibatay iti karbengan ti kaaduan a Filipino.
Segun kada Tinio ken Co a nangipila iti HB No. 210, saan a pudno ti ibagbaga dagiti mangsupsupiat iti diborsio a rebbaen ti diborsio ti panangipateg iti panagkasar.
Dinakamatda ti kasasaad ti Italy (a yan ti Vatican), ken Spain, dua a pagilian a kaaduanna ket Katoliko, a mangipalubos iti diborsio. Ken nupay maipalubos, bassit ti agdibdiborsio kadagiti dua a nadakamat a pagilian.
Adda divorce rate ti Italy a 181 kada 1,000 a nagkasar a populasion, idinto a bimmaba ti diborsio iti Spain sipud idi 2007.
Sinalimetmetan ti gakat ti panagraem ken kinasensitibo kadagiti nadumaduma a narelihiosuan a pammati iti Filipinas babaen ti panangbigbigda iti pakasapulan iti nagduduma a wagas ti panangtaming iti saan a naballigi a relasion gapu ti kinaadu ti pammati ken kannawidan iti pagilian.
Gapu itoy, pinagtalinaedda ti agdama a remedio kas iti legal separation, annulment, ken declaration of nullity of the marriage, ket innayonda ti diborsio kas maysa kadagiti wagas ti panagsina ti agassawa. (Ellson Quismorio/Manila Bulletin//Lito Hilidon/Bannawag)
