Impila ni Senador Panfilo "Ping" Lacson ti gakat a mangpapigsa ken mangpabaro iti daanen a paglintegan ti pagilian a kontra iti panagespia ken dadduma pay a kapadana nga aramid a maibusor iti nailian a seguridad ti Filipinas.
Tarigagay ti singasing a “New Anti-Espionage Act” a nayonan dagiti dusa kontra iti panagespia, mangiraman kadagiti baro a teknolohia, ken dagiti aktibidad dagiti ganggannaet a makibiang iti ar-aramiden ti gobierno.
Napaliiw ni Sen. Lacson, dati a hepe ti Philippine National Police (PNP), a naiparangarang dagiti pagkurangan iti Commonwealth Act No. 616 ken ti Article 117 ti Revised Penal Code babaen ti kaudian a panagdur-as iti teknolohia, agraman ti posible a pannakibiang dagiti ganggannaet a turay iti napolitikaan ken panangituray nga ar-aramid ti pagilian.
Maibatay iti gakat, maisaknap ti kaipapanan ti panagespia (espionage) ket mairaman ti pisikal, elektroniko, internet, wenno ania man pay a wagas, a mangpataud wenno mabalin a mangpataud iti pannakadadael ti Filipinas wenno mangipaay iti bentahe iti dadduma nga estado, pagilian, entidad, wenno tao, ganggannaet man wenno umili.
Kasapulan ti natibker ken nainkalintegan a pagtaktakderan iti parikut iti WPS --NMC
Dinakamat ni Lacson dagiti nadumaduma nga insidente ti panagespia iti nadumaduma a paset ti pagilian iti kallabes, agraman ti pannakasamsam ti lima nga underwater drones iti nadumaduma a paset ti pagilian. (Hannah L. Torregoza/Manila Bulletin//Lito Hilidon/Bannawag)
