Nangipila ni Senador Panfilo Lacson iti gakat a linteg a mang-regulate iti panagusar iti social media dagiti menor de edad, a dinakamatna dagiti panagadal a natakuatan a ti nalabes a pannakaigamer iti social media ket makaapektar iti salun-at ti panunot.
Iti singasingna a linteg, dinakamat ni Lacson ti panagadal ti United Nation Children’s Fund a nangipalgak a nagbalinen a vulnerable wenno nalaka a maapektaran dagiti menor de edad a Filipino iti cyberbullying, body image pressures, ken online harassment.
Dinakamatna pay ti report ti Council for the Welfare of Children a nangibatad a maysa iti kada tallo a menor de edad a Filipino ti agus-usar iti internet.
Segun met iti National ICT (information and communications technology) Household Survey, 60 a porsiento kadagiti ubbing nga agtawen iti 10 agingga iti 17 ti aktibo nga agus-usar iti internet.
Kasapulan ti natibker ken nainkalintegan a pagtaktakderan iti parikut iti WPS --NMC
Napaliiw pay ni Lacson a dagiti dadduma a pagilian kas iti Australia, nangipatungpalda kadagiti addang a mangtaming iti panagusar iti internet kadagiti menor de edad. Kinuna ti senador a rumbeng a maaramid met koma ti kastoy iti Filipinas.
“Kas inspirasion manipud iti daytoy a modelo, ken kas panangtungpal iti naideklarar a polisia ti Estadotayo a mangitandudo ken mangsalaknib iti mental ken emosional a pagimbagan dagiti ubbing, maisingasing daytoy a gakat a mangsalaknib kadagiti ubbing a Filipino nga awan pay 18 ti tawenda manipud kadagiti online risk ken makadangran a linaon babaen ti panangiparit kadagiti menor de edad a makaakses wenno agusar kadagiti social media platform,” kinunana iti maysa a statement idi Mierkoles, Hulio 2.
Segun iti gakat, rumbeng nga ipatungpal dagiti social media platform dagiti “nainkalintegan nga addang ken wagas ti panangberipikar iti edad tapno malapdan dagiti age-restricted user nga agparehistro, makaakses, wenno agtultuloy nga agusar kadagiti social media service-da." (Leonel Abasola/PNA)
